Un bela di inspiración, calor y stimacion cu a ilumina alma y curason mas di un siglo na Dakota y Aruba henter te na su final: e bida largo y bunita di Jose Maria Dania. Te den su ultimo rayonan ainda tabata pone e claridad bao di cual famia y amistad tabata bini hunto den Fe y amor.
Jose Maria Dania, Papa Dania, “Pai” tabata onderofficier den “Vrijwilligers Korps Aruba. (VKA)”. Den comunidad di Aruba conocí como soldat di Schutterij den tempo di guerra. Fiel nos tabata mira Papa Dania marcha cu frente na laira banda di su companjeronan, cu ainda tabata na bida, riba día di conmemora fayecidonan den guerra. Como Minister President mi a haya diferente oportunidad bunita pa scucha di nos schutternan di e trabao cu nan a desplega den tempo di guerra na Aruba. Papa Dania semper a contami e historia aki cu un sentido grandi di orguyo. Un personahe cu a concidera core riesgo pa su Pais y hendenan como un honor.
E mesun sentido di compromiso aki e a desplega den su bida personal, su trabao y den su amistad cu su prohimo. Un icono di Dakota cu a bira un icono di Aruba. Un bida hiba simpel, tranhando duro y semper inculcando respet y admiración. Papa Dania tabata un bunita hende pa nos tur. Cu tur ternura nos Creador lo tume den su brasanan, manera Jose a stima y braza su prohimonan. Na famia Dania y Dakota henter hopi forza y consuelo. Nos lo corda Papa Dania pa semper.
Ex Promer Minister mr. Mike Eman a comparti e bunita recuerdo aki di Jose Maria Dania riba su pagina social.
