ORANJESTAD,Aruba
Diaranzon atardi Minister Xiomara Maduro a haci apertura di e exposicion di Censo 1960 – 2010 na Archivo Nacional Aruba. Departamento Central di Estadistica CBS a expone informacion compila di e censonan cu a keda efectua desde e promer censo oficial na 1960 cu ta mustra ken nos ta, cuanto nos ta y con nos ta biba na Aruba. Den e exposicion por haya informacion riba e desaroyo di nos Pais y tambe por sera conoci cu e 17 metanan di Nacionnan Uni pa desaroyo sostenibel y con esaki ta wordo observa na Aruba.
E Exposicion ta conta e Historia di e Censo di Poblacion y Vivienda na Aruba desde aña 1960 te cu aña 2010. Un Censo di Poblacion y Vivienda ta wordo ehecuta cada 10 aña segun recomendacion di Nacionnan Uni. E prome Censo cu a wordo teni na Aruba a wordo ehecuta bou di auspicio di Lago Oil Company. E tempo ey Aruba tabata conta cu un poblacion di 53.199 persona, menos di mitar di locual e poblacion actual ta. Na e prome kwartaal di 2020, e poblacion di Aruba ya tabata conta cu un total di 112.321 persona. Mester enfatisa cu durante di un Censo no ta conta solamente persona, pero tambe tur vivienda na Aruba. Pa por haci esaki posibel, un grupo grandi di personal di conteo ta bishita tur vivienda na Aruba den e periodo di conteo. Censo 2010 tabata conta por ehempel cu un team di 1.068 personal di conteo. E exposicion aki ta conta e historia di e Censo pa medio di 4 tema principal cu ta relata na e preguntanan cardinal cu mester wordo contesta pa medio di un Censo, esta: 1). Ken nos ta. 2). Cuanto nos ta. 3). Con nos ta biba. 4). Na unda nos ta biba 2. Bou di e 4 temanan aki, e Exposicion ta presenta datonan colecta riba diferente subtema manera entre otro: pais di nacemento, nacionalidad, educacion, labor y composicion di hogar. Tambe mester enfatisa cu e Exposion no solamente ta presenta datonan di pasado, pero tambe ta presenta datonan di proyeccionnan di nos poblacion te cu aña 2030. Ademas e exposicion ta presenta e Metanan di Desaroyo Sostenibel di Nacionnan Uni. E asina jama SDG’s ta forma e modelo pa sigui pa desaroya nos pais na un manera sostenibel, usando datonan relevante y confiabel pa sigura cu ningun persona ta wordo laga atras y manteniendo e persona central. E aña aki ta marca e comienso di e decada di implementacion di e Metanan di Desaroyo Sostenibel. Oficina di Estadistica di Aruba (CBS), como parti di e comision di Metanan di Desaroyo Sostenibel di Aruba ta contribui na colecta datonan pa por monitorea e progreso di Aruba pa locual ta trata e implementacion di e SDG’s. Den e cuadro aki, un Censo ta e instrumento principal pa e coleccion di datonan necesario pa e calculacion di e indicadornan di SDG’s. Den
e exposcion por aprecia un muraya cu ta representa tur e 17 Metanan di Desaroyo Sostenibel. Minister Xiomara Maduro ta invita e pueblo pa bishita e sala di exposicion na Archivo Nacional Aruba y wak tur locual un Censo por nifica pa pais Aruba y conoce e Historia di Censo y tambe e inovacionnan cu Censo a conoce durante e añanan 1960 pa 2010. Tambe e mandatario ta manda danki na Archivo Nacional Aruba pa e uzo di nan edificio pa por expone e historia di Censo y tambe pa yuda compila datonan. Un danki ta bay tambe na Oficina Central di Estadistica Aruba pa compila e datonan y organisa e Exposicion pa asina mantene nos pueblo bon informa tocante e historia y desaroyo di Censo na Pais Aruba.