E exposicion di potret “E Lens di mi Wowonan” ta habri oficialmente te cu diabierna 27 di september den Biblioteca Nacional di Aruba. Den exposicion tin 235 potret y 25 fotografo a participa. E exposicion a bira un tradicion di tur aña y e ta un oportunidad pa reconoce y celebra esnan cu ta dedica nan bida na medionan di prensa y comunicacion.
E exposicion ta habri pa publico dialuna y diaranson te cu 7’or di anochi y e otro dianan te cu 5’or di atardi.
Nos kier gradici RBC, sponsor principal, cu ta aportando na expo aki pa 19 aña consecutivo, hunto cu varios otro contribuyentenan cu nos mester gradici:
• Tur fotografonan cu a participa e aña aki.
• Rhona Dijkhoff pa su apoyo general na e expo aki pa hopi aña.
• Sra. Astrid Britten di Bibloteca Nacional cu pa e ultimo aña e expo ta tuma luga eynan.
• Fernando Vermeer, representando Checkpoint Color y tambe Natalie Budhan.
• Ricky Yarzagaray di Ricky Rex Photography.
• Masy Fral, pa su bunita awardnan.
• Keila LieKwie di LieKwie Food & Catering Service pa su dushi cuminda.
• Andrew Vrolijk cu a diseña e invitacion.
• Claidson Corea y Raymond Winterdal pa nan ayudo di setup.
• Personal di Biblioteca Nacional.
E aña aki, deporte na Aruba a destaca den e exposicion; potretnan di wega olimpico, Little League Baseball Williamsport, landramento, futbal y mucho mas.
A reconoce 4 persona den medionan di prensa cu nan tremendo trabou; Farrah Boekhoudt, Marianellys Elena Ortin Nava Berry, Hubert de Cuba y Joshua Bryson, cu a haya e “Djispie Franken Award”.
Tambe a reconoce 2 institucion; Fundacion Rancho Aruba, cu a celebra 200 aña di existencia di Oranjestad y Biblioteca Nacional Aruba cu a celebra 75 aña di existencia.
Ademas tin potretnan di Women’s Club of Aruba cu ta celebrando 90 aña e aña aki.
Prensa tin un funcion importante pa mantene nos pueblo informa riba loke ta pasa den nos comunidad y e desaroyonan global.
Nos ta invita tur hende pa bishita e expo y rendi homenahe na esnan cu ta dedica nan bida na medio di prensa. Nos ta spera di wak bo!
