Artista Luisa Elena Betancourt ta presenta su exposicion ‘Aruba Marine life’ na biblioteca na O’stad. Esaki ta habri den Sala di Exposicion te cu dia 31 di maart, henter dia. Publico ta bon bini pa pasa wak e exposicion bunita aki.
Artista Luisa Elena Betancourt ta un artista Venezolano y ta biba na Aruba ya for di 2016. Luisa ta combina su trabou di artista cu un otro pasion, fotografia bou awa. Sacando potret di bida marino den lama di Aruba, Luisa a yega na un coleccion di potret marino exotico, unico y extenso. Un coleccion di potret di pisca, otro bestia, mata y tambe coral. Artista Luisa Elena Betancourt a produci un buki di bida Marina dilanti nos costa, muy en particular Mangel Halto y Boca Catalina. Su admiracion pa e bida marino a trece hopi inspiracion y un desaroyo artistico diferente. Varios potret a inspira e artista pa pinta riba canvas y crea obra di arte den forma di collages digital.
Presentacion di Luisa ‘Aruba Marine life’ su buki a tuma lugar ayeranochi na biblioteca. Directora di Biblioteca Nacional Aruba, sra. Astrid Britten, a ricibi 5 ehemplar di e buki aki pa bishitantenan por lesa y fia. Sr. mr. Edgard G. A. Vrolijk, presidente di Parlamento, tambe a ricibi un copia. E buki ta un prueba di Aruba su bunitesa den lama y ta yuda na conoce tur e diferente criaturanan cu ta biba dilanti nos costanan. Un mundo precioso pa cuida y conserva. Potretnan den e buki ta acompaña cu un descripcion cortico na Ingles.
