Museo Arqueologico Nacional Aruba ta gradici pueblo di Aruba cu a inclui nos den su bishita riba Dia di Betico. Den 4 ora a ricibi mas di 500 bishitante cu a mustra hopi interes den nos herencia arkeologico. Tabata notabel cuanto hende a tuma e oportunidad pa papia cu e arkeologonan, a haci pregunta na empleadonan di museo presente den sala di exposicion, cu a sigui e presentacion tocante di artefactonan di Oranjestad antiguo y cu a cumpra e catalogo di pintura riba baranca e dia special aki.
Salanan di exposicion tabata continuamente yen. Grandi y chikito a pasa dushi hunto lesando, scuchando y intercambiando nan experiencia. Den hardin tabata reina un ambiente placentero cu famia. Muchanan como tambe algun mayor tabata traha obra di man, busca stempel di Indjan y a sinta un rato pa bebe un koffie, te of juice. Muchanan trankilo a disfruta di e pelica tocante di cuido di monumento “Un les pa Maikey”, cortesia di Stichting Monumentenfonds Aruba (SMFA), mientras nan tabata disfruta di popcorn di Pastoral Hubenil Dakota.
Un 50 persona a presencia e lectura duna pa arkeologo Raymundo Dijkhoff tocante hayazgonan interesante di Oranjestad, tanto di e periodo Indjan como di e periodo Europeo y a keda impacta pa tur e informacion cu a haya. Arkeologo Harold Kelly a intercambia cu bishitantenan di diferente edad tocante entre otro su proyecto di investigacion en conexion cu cambio di clima y su efectonan y asina a haya informacion valioso di conocemento di nos hendenan local. Fundacion 1403 tabata presente pa bende e bukinan di pintura riba baranca cual ta casi ‘sold out’.
Dia di Betico 2023 tabata hopi exitoso pa MANA, unda hopi famia a opta pa bishita nos localidad. MANA ta hopi contento di a mira caranan conoci bek na museo y hopi cara nobo. MANA ta gradici Pastoral Hubenil Dakota, F1403, SMFA y un y tur cu a yuda haci e dia aki exitoso.
MANA ta keda na Schelpstraat 42 na Playa den e compleho di edificionan Ecury y moderno. Sigui nos paginanan di Facebook Museo Arqueologico Nacional Aruba y National Archaeological Museum Aruba pa nos actividadnan pa publico.
