E siman aki a tuma luga e di 30 edicion di e Conferencia Annual di Turismo (CATA) via e online platform Zoom.
Esaki a sosode diamars mainta unda a habri e conferencia cu e Himno di Aruba. Despues e directora di A.T.A. pa e mercado Latino Americano Sra. Miriam Dabian a dirigi palabra di bonbini na tur participante y a wordo comparti entre otro e importancia di CATA pa cu e mercado di turismo procedente di Latino America pa Aruba y un clip cu mensahenan clave di CEO di A.T.A. Ronella Tjin Asjoe-Croes, CMO di A.T.A. Sanju Luidens-Daryanani, GM di Hyatt Regency Aruba den su funccion como representante di AHATA Gabriel Castrillon y CEO di Aruba Airport Authority Joost Meijs. Ademas e participantenan a wordo presenta diferente clip cu ta mustra bon cla tur e actualisacionnan/rekisitonan cu Aruba ta exigi di un bishitante prome cu nan yega nos isla pa disfruta di nan vacacion. Tambe e promocionnan nobo cu e mercado ta trahando riba dje actualmente pa loke ta trata e reapertura di Latino America, di cual fecha lo wordo anuncia pronto. No obstante cu –debi na e pandemia– e fronteranan di Latino America pa Aruba ta cera – pero esaki no a stroba pa sigui produci y anticipa pa ora e fronteranan bolbe habri.
Despues a presenta un panel pa asina tur participante por haci nan preguntanan, cual moderador tawata e conocido Luis Carlos Vélez Marroquín cu ta un journalist y ehecutivo di noticia. Ademas Vélez Marroquín ta fungi como director di noticia na RCN Radio y ta un locutor na e emisora La FM.
E panel tawata consisti di: CEO di A.T.A. Ronella Tjin Asjoe-Croes, Chief Commercial Officer di Avianca Colombia Silvia Mosquera, Directora di Economische Zaken Aruba Maria Dijkhoff-Pita y Commercial Vice President di Copa Airlines Christophe Didier.
KICO TA CATA?
CATA ta e Conferencia Anual di Turismo di Aruba dirigi riba e mercado latinoamericano y ta un di e conferencianan mas importante pa cu Aruba su turismo procedente for di Latino America. CATA su obhetivo, pa 30 aña caba, ta pa brinda posibilidad pa reforsa e conocimento di Aruba na e ehecutivonan y pa sigui traha riba e relacionnan cu e socionan, enfocando asina riba oportunidadnan cu por enrikece nos mercado turistico. Pa celebra 30 aña di CATA y debi na e situacion actual, tawatin dos cambio importante: CATA a wordo teni digital y a habri e prome dia di conferencia cu agencianan di viahe y cu miembronan di e comunidad educativo di turismo.
RECUPERACION DI NOS TURISMO
Durante su presentacion, Tjin Asjoe-Croes a laga sa cu e plan pa 2021 ta pa recupera e total di bishitantenan pa nos isla entre 45% pa 60% y mescos tambe pa loke ta trata e tourism receipts (loke e turista ta laga atras den nos economia) cu 45% pa 60%. Tambe pa loke ta turismo crucero ta pa recupera esaki entre 45% pa 67%.
Tjin Asjoe-Croes a añadi cu algun aspectonan a resalta despues di e reapertura di nos fronteranan. Den e ultimo 3 luna cu Aruba a bolbe habri su fronteranan pa e turismo internacional por a nota cu e comportacion di e turista a ahusta pa loke ta e confiansa den nos marca y den nos isla pa un vacacion. Ademas, casi tur aerolinea ta cla pa bolbe Aruba, tumando na cuenta cu ya caba Aruba su fronteranan ta habri pa ricibi buelonan for di Merca, Caribe y Europa. Aerolineanan manera COPA y Avianca tin intencion pa bolbe Aruba manera cu nos fronteranan bolbe habri pa Latino America, cual ta parti di e plan di recuperacion.
Loke tambe ta notabel ta cu e perfil di nos bishitantenan ta mas jong di loke ta custumber. Esaki ta cuadra perfectamente cu e strategia di mercadeo y e tipo di bishitante desea for di Latino America, tumando na cuenta e desaroyo economico di cada pais y mercado.
PARTICIPACION Y PREPARACION PA 2021
E siguiente dia, CATA a presenta virtualmente su vitrina cual ta masha importante pa e negoshinanan por prepara pa 2021. Aki e operadornan di tour pero tambe representantenan di aerolineanan, hotelnan y otro comercio ta negoshia pa loke por spera pa e siguiente aña.
E aña aki tawatin un total di 859 participante, entre otro di paisnan manera Argentina – Armenia – Brazil – Chile – Colombia – Costa Rica – Ecuador – Mexico – Hulanda – Panama – Paraguay – Peru – Spaña – Merca – Uruguay y Venezuela.
