Awe Diaranson 6 di november ta recorda cu 80 aña pasa, e hoben Segundo Jorge
Adelberto Ecury, miho conoci como Boy Ecury a perde su bida den e lucha pa libertad
di Hulanda durante e Segundo Guerra Mundial. Boy Ecury tabata un luchador di
resistencia Hulandes y a wordo fusila door di e Alemannan dia 6 di november 1944.
Relaciona cu e fecha aki Gobierno di Aruba a decreta tur 6 di November como e “Dia
Nacional pa conmemora tur luchador di Resistencia Nacional y den Reino”. Pa e
occasion special aki un ceremonia protocolar lo tuma lugar diaranson mainta na e
Parke Boy Ecury y na su estatua di Boy Ecury.
Exhibicion na Archivo Nacionl Aruba: Na Archivo Nacional Aruba tin un coleccion
grandi di e archivo di e famia di Boy Ecury. Diahuebs, ultimo dia 31 di october tabata
un dia hopi special pa ANA ora cu e coleccion aki a wordo enrikece cu mas
pertenencia personal di Boy Ecury. E coleccion aki tabata warda na Hulanda cerca su
subrino d.f.m. Sr. Ted Schouten. E vuida di Sr. Schouten, Sra. Marianne Schouten
acompaña di su yui muhe Victoria Schouten, esposo y yui muher a biaha pa Aruba cu
e pertencianan personal di Boy Ecury, pa asina haci entrega di esaki na Archivo
Nacional Aruba pa nan por wordo warda hunto cu e demas coleccion cu otro
famianan di Boy Ecury a traspasa den pasado.
ANA a ricibi diferente album cu potret y articulo di corant colecciona pa Sr. Schouten y
tambe algun pertenenecia di Dundun Ecury, manera buki, album, potret y carta, cual
mayoria ta bay tocante di Boy Ecury. For di e materialnan por saca afo mas di e bida
di Boy Ecury despues di lo sucedido y por wak e for di e perspeciva di famia y haya
mas detaye di diferento suceso cu a tuma luga.
E prenda mas special cu ANA ta bai ricibi for di e famia ta e “verzetskruis (cruz di
restistencia)”, un medaya cu a wordo entrega na e famia como honor na e lucha di
Boy Ecury pa e libertad di Hulanda. Tambe e ultimo carta “wilsbeschikking” skirbi pa
Boy Ecury prome cu e a fayece y e carta cu Reina Wilhelmina a skirbi pa e mayornan
di Boy.
ARCHIVO NACIONAL ARUBA
Nationaal Archief van Aruba
National Archives of Aruba
E famia tabata tin tur e materialnan aki warda na Hulanda y cu e fayecimento
recientemente di Sr. Ted Schouten su vuida y su famia a dicidi di traspasa e
pertenencianan aki na Aruba.
E “verzetskruis” lo wordo entrega na Pais Aruba diaranson 6 di November na Prome
Minister di Aruba Sra. Evelyn Wever-Croes, pa despues e wordo warda y exhibi na
Archivo Nacional Aruba.
E “verzetskruis” ta un honor hopi special pa nos luchador di resistencia Boy Ecury. E
“verzetskruis” y e ultimo carta di Boy Ecury, lo wordo exhibi na ANA entrante
diaranson 6 di november pa 2’or di merdia. Despues di e dia aki, e artefactonan aki lo
keda exhibi na ANA pa e publico por admira durante orario di oficina.
