“Mi lo ta ausente pa un rato. Just unrato! Sigur un learning experience importante, purba saca lo mas positivo di un experiencia negativo. Mi ta carga mi responsabilidad y lo sinta cu un curason y mente trankil. Mi lo bolbe. No ta delaster cu boso a mira di mi. Love my family,” na momento cu e mensahe aki a aparece riba Facebook di Paul Croes pa 8.40 di mainta. E momento ey ya Croes a drenta KIA pa cuminsa sinta su castigo.
Recientemente Hof a dicta su sentencia final cu cual no a keda ningun otro caminda pa expolitico. Esaki tabata nifica cu e mester bay sinta su castigo. Extraoficialmente por a compronde cu a dun’e espacio pa despedi di su famia. E fecha di su entrega tabata conoci den un circulo hopi chikito cu a mantene e fecha di su entrega secreto. A pensa cu ta e siman aki pero niun hende a sospecha cu e lo a sosode diamars mainta, sin cu ningun medio na altura of presente.
Croes mester sinta un castigo di 3 aña, kitando un tercera parti pa bon comportacion, esaki ta nifica 2 aña den KIA. Extra oficialmente por a compronde cu ta evaluando un caso unda cu ta pusha pa pidi un reduccion di pena pa violacion di derecho humano.
Paul Croes ta envolvi den caso IBiS, cu ta papia di corupcion y soborno. E ta e prome politico local condena pa corupcion den funcion.
Esnan cu ta sigui e cuenta di Paul Croes, por a nota cu e tabata dedica hopi tempo cu su famia y e yiunan, probablemente preparando nan pa e despedida pa un tempo cu e lo ta aleha di nan, y laga nan pa un tempo cu bunita recuerdonan. Forsa na famia y yiunan den e temponan dificil, pero cu nan positivismo lo sigui sali padilanti y lo yuda ex politico Paul Croes tambe pasa over di e tempo dificil aki.
1 comment
[…] Source link […]