Ex Minister Otmar Oduber : Fraccion mas grandi den oposicion y coalicion ta dudando si sostene RAFT

En todo caso e mundo ta riba su cabez aki na Aruba”, asina ex ministro Otmar Oduber a trece dilanti ayera den un comunicado emiti riba e ultimo desaroyonan pa loke ta e acceptacion of no di e RAFT. Manera treci dilanti caba siman pasa, e realidad ta cu RAFT  ta un “Fait Accumpli”, osea no tin awa pa laba mas, osea e ta un hecho. A purba dune tur sorto di nomber, pero lamentablemente ta Aruba mes a percura pa duna Hulanda e espacio pa por impone e Rijkswet aki riba nos. Prome Ministro a acorda cu Den Haag pa cana e caminda aki cu e pensamento di por sera un miho deal posibel pa loke ta e refinanciamento di e debe di 916 miyon cu Aruba a fia den e temporada di pandemia. Esaki ta e razon tambe pa cual varios gremio a vocifera nan opinion fuerte na favor di RAFT, osea e acuerdo di principio cu Prome Ministro a firma cu gobierno di Hulanda.

SLA RIBA NOS AUTONOMIA

E dolor cu claro ta keda, ta e hecho cu Aruba ta perde un parti grandi di su autonomia y esaki ta significa cu Parlamento ta perde e esencia di nan “Budget Recht”, cu ta un parti fundamental di nis Status Aparte. Gobierno di Hulanda corectamente ta bisa cu si kier pa Hulanda para garantia pa e refinanciamento na un interes preferencial cu Hulanda ta haña, anto e ora nan mester tin e siguranza cu Aruba no ta laga nan cara na berguenza serca esnan cu lo fia e placa aki na un interes ventahoso. Ta papia aki di un reduccion di mas of menos 30 miyon pa aña, durante 20 aña cu ta un suma total di minimo 600 miyon menos na interes cu lo mesyer worde paga. Riba su mes caba ta un razon valido pa Prome Ministro Wever Croes a firma e acuerdo aki cu Hulanda.

A YEGA ORA PA ADAPTA NOS LEYNAN Awor no ta keda nada otro mas cu negocia kon Aruba por implementa su propio organismo nan di control y leynan pa evita cu e escalacion aki di debenan ta sigi den futuro. Aki mester pensa riba leynan cu ta haci imposibel pa un gobierno por endeuda e Pais  pa sumanan miyonario pa mas di 5 aña. Si esaki ta rekeri pa ta un termino mas largo, anto e ora mesyer un mayoria di dos tercera parti di nos Parlamento. Evitando asina cu e debe por sigi aumenta den futuro y haciendo e demcracia parlamentario mas bino.

PLAN DI INVERSION A LARGO PLAZO

DI otro banda mester haci central den e negosacion nan cu Hulanda, pa Aruba por utiliza e interes aki cu ta keda reduci dor di e interes preferencial, den inversionan cu ta na bienestar di Pais Aruba. Mescos pa loke ta konta posibel “Surplus” nan fu por keda genera den e presupuesto general. Evitando cu esakinan ta bai unicamente pa paga debenan acumula. E maneho aki di crea espacio pa inversion mester worde ancra den leynan cu ta mara cualkier gobierno di turno na un plan di inversion a largo plazo di 10 of mas aña. Aki ta caminda cu gremionan y como tambe politica engeneral mester por tin e madurez y boluntad pa crea un solo frente pa logra convence Hulanda pa bai den e direccion aki.

Madurez mester worde accepta awor serca tur cu ta forma parti di e negosacion nan aki, paso discuccion ya caba ta “geppaseerd station”, awor mester sera cabez y duna sosten na un solo meta en comun na beneficio di henter e Pais. Madurez di parti di politiconan cu mester compronde cu nos a yega na e punto aki pa motibo di e mesun falta di responsabilidad di e mesun Parlamentonan durante añanan.  Madurez di parti di gremionan cu tambe mester tin e sentido di comprencion pa cu un lucha cu a eorde hiba duranye decadanan pa por tin nos propio destino den man y aki tin un rol pa yuda guia esaki y coregi loke no a bai bon y sostene e gobierno na turno atravez di dialogo objetivo y constructivo. Ta intersante claro pa wak e posicion tuma pa e dos fraccion nan mas grandi den Parlamento y wak si nan tambe ta realiza cu aki no tin espacio ni tempo mas pa ta imparcial den e decicion nan cu mester worde tuma si ta sostene e gobierno y su Prome Ministro cu a acorda cu Hulanda un ruta y pa duna esaki e miho contenido posibel bao di e circumstancianan actual. Unavez cu a fiha e posicion aki hunto y uni, cuminza e proceso di inmediato pa un dialogo nacional riba reduccion di gastonan di gobierno pero tanto na largo pero tambe corto plazo.