Ex Minister Otmar Oduber a yama un conferencia di prensa despues cu Ministerio Publico a saca un comunicado. E ex mandatario a ricibi notificacion for di ministerio publico dia 5 di juli cu nan lo tin intencion di dagvaart su persona pa loke ta trata e caso flamingo, 10 siman despues 20 di september ta haya un e mail cu ta keda mara na loke cu a ser bisa na 5 di juli cu nan tin e intencion di bay dagvaart su persona y lo laga sa ki dia esaki lo ta.
Ex minister Otmar Oduber ta kere cu esaki ta netamente e abuso cu ta tumando luga, e ta un abuso paso e no ta un manera pa trata ningun hende. Si ministerio publico ta buscando un forma pa incrimina un persona cu awe por ta un politico, un persona cu a ocupa 18 aña largo un funcion publico na Aruba, 8 aña parlamentario, 10 aña como minister y dos aña como vice prome minister di pais Aruba.
Segun Oduber e abuso ta tuma luga na momento cu ta caba mentalmente cu un hende, caba mentalmente cu un famia, caba finansieramente cu e meta di mira Otmar Oduber bancarota. Un proceso cu no solamente abase di loke ta tumando luga strafrechtelijk , pero a haya su mes cu diferente otro di casonan manera di banco, negoshinan cu practicamente a kibra pa motibo di e caso aki.
Na momento cu a keda notifica cu e investigacion a caba na november/ december aña pasa y despues a bisa na februari cu rapport ta kedando cla y ainda no a keda cla, pero cu a indica cu e rapport lo keda cla na maart , pero awe nos ta drentando casi october unda cu aña ta bay caba.
Si a investiga Otmar Oduber 4 aña largo y den e 4 aña nan ey a practicamente caba cu mi bida, caba cu mi negoshinan, caba cu mi mentalmente, emocionalmente, mi salud, caba cu mi persona den tur sentido, asina e ex minister a expresa.
Ministerio publico ainda no ta cla cu investigacion despues di 8 luna pasa cu e investigacion lo mester tabata cla. Sinembargo ministerio publico ta manda un mail unda cu ta bisa cu tin e intencion, lo haya sa ect ect, den tur e proceso aki como ciudadano tin 4 aña ta warda.
E situacion aki ta parce un persecucion politico cu ta cuminsa for di Hulanda cu ta sigui pa institutonan na Aruba y ta caba riba su persona, segun Otmar Oduber. Ta imposibel cu tres PG a pasa Aruba caba y awo nos tin un di 4 PG cu ta un Arubiano , tambe a pasa ya caba 5 fiscal cu tin cu atende cu e caso aki y tur hende ta keda rek.
Ex minister Otmar Oduber ta kere firmemente cu e situacion aki ta un sed di vengansa di Hulanda y di politiconan aki na Aruba cu ta busca cueste loque cueste pa mira con pa haya algo pa pega na Otmar Oduber. E caso flamingo a cuminsa na aña 2019 unda cu opdracht a wordo duna pa persigui Otmar Oduber. Tabatin 7 proces-verbaal cu tabata caso flamingo.
Segun Otmar Oduber e caso flamingo a keda crea door di un funcionario den KPA cu a traha e rapport nan den e unidad cu ta ser yama BCI. E departamento aki ta traha 7 rapport sin prueba, pero riba shisheria/ redo cu testigonan cu nan ta bisa cu nan a haya segun nan chekeo cu ta testigonan cu nan por confia.
Sinembargo despues cu a wordo deteni y cu a wordo maltrata a bin resulta cu tur 7 proces-verbaal a cay debi cu no a haya ningun prueba. A coba den cas, laptop , telefon tur caminda cu tabata por caba y no a haya ningun prueba, hasta placa cu a haya na cas di su mayornan a keda entrega bek.
Con por ta posibel di ta persigui un persona asina unda cu tur e 7 proces-verbaal nan cu a wordo traha a keda bari for di mesa paso nan tabata falso traha. Awe mirando esaki oficialmente Otmar Oduber a duna di conoce cu oficialmente a entrega un keho na nos PG nobo Arubiano. A entrega e keho aki cu ta su ultimo krenchi pa kere cu algo husto por wordo haci den e caso di flamingo. Otmar Oduber a denuncia Cuerpo Policial Aruba, unidad di BCI y e ambtenaarnan cu a firma e 7 proces-verbaalnan .
Despues di tur e acusacionnan cu a ser haci contra di Otmar Oduber cu supuestamente lo tabata den crimen organisa, cu tin cuenta di banco na Panama y Merca unda cu tin cantidad di miyones den exterior, nada di esaki ta cuadra cu berdad, tur esakinan a keda bari for di mesa, pero awe e acusacion cu OM kier bin cu ne ta cu un hende lo a , porta a haya placa anto porta Otmar Oduber lo a uza su influencia, pa yuda e hende porta, paso politicamente nan a bisa cu nan lo bay sostene su persona y lo vota pa su persona.
Ta trata aki di un dossier di 7 mil pagina cu na ningun caminda ta indica cu Otmar Oduber a haya placa. Tur e acusacionnan ta cu otro hende porta lo a haya algo y mi persona pasivamente a wordo cumpra pa voto y tambe un hende pa e haci propaganda pa mi, paso e un hende ey cu a haci propaganda pa mi tabata un periodista. Sinembargo tin 11 periodista na Aruba cu ta traha pa diferente gobierno nan, pa parlamento y awe ainda tin periodistanan cu ta traha pa gobierno nan.