Ex minister di enseñansa Rudy Lampe ta duna di conoce den conferencia di prensa cu a tuma nota den medionan di comunicacion cu minister di enseñansa Endy Croes a para implementacion di e scol Arubano multilingual SAM cu tabata e proyecto cu a keda introduci pa ehecuta Papiamento como lenga di instruccion den enseñansa.
Ex minister di enseñansa ta lamenta e echo aki y kier pa pueblo ta na altura y tuma nota di e cambio aki y e situacion aki, mirando cu esaki ta bay afecta directamente futuro di e muchanan di Aruba.
Segun ex minister di enseñansa na momento cu bo ta bira minister e minister mes no ta ehecuta su idea of su capricho, pero ta bay eleccion cu un partido politico cu tin un programa di gobernacion y si haya e sosten di e votado cu ta vota pa e programa di gobernacion e plan mester keda ehecuta.
Na momento cu ta forma coalicion ta yega na un programa di gobernacion abase di e programanan electoral cu a bay cu ne eleccion. Despues di esaki e minister ta haya e encargo pa ehecuta e programa di gobernacion. Segun ex minister Rudy Lampe pa e motibo aki mes un minister ta un ehecutor di un programa di gobernacion y no por sinta como minister y ehecuta bo mes un programa, segun ex minister di enseñansa Rudy Lampe.
Hunto pa Aruba ta un programa di gobernacion cu tres partido a forma gobernacion entre partidonan MEP-POR-RED. Na pagina 23 maneho di idioma e programa di gobernacion ta bisa duna Papiamento su luga mereci den enseñansa banda di otro idioma.
E maneho di idioma Papiamento lo wordo defini basa riba e resultadonan di e proyecto piloto scol multilingual na scolnan basico. Segun ex minister di enseñansa Rudy Lampe na momento di implementacion di Papiamento na scolnan lo aloca fondonan pa por realisa e proyecto. Partido RED den gobierno a introduci e idea den e programa di gobernacion cu e otro partido nan y nan a bay diacuerdo.