Dia 22 di yüni a tuma lugá na Corallium un evento spesial i signifikante: ‘Yu
sin doló: Un Diálogo Habrí’. E evento akí, organisá pa Biblioteka Públiko Boneiru, a trese
komunidat di Boneiru huntu pa un kòmbersashon profundo tokante nifikashon di ta òf kria
un ‘Yu sin doló’, un yu di kriansa no ofisial.
Biblioteka Públiko Boneiru ta desaroyá su mes di un biblioteka tradishonal pa un biblioteka
sosial kultural, ku ta organisá un seri di aktividat riba e tereno di arte i kultura, promoshon
di lesamentu, enkuentro i debate i abilidat básiko. Patrimonio kultural ta un parti
importante di esaki.
Den kuadro di seramentu di aña di konmemorashon pasado di sklabitut 1 di yüli 2024, a
organisá e evento Yu sin doló. Esaki a bira posibel ku sosten di Entidat Públiko Boneiru
(EPB) i ministerio di Enseñansa Kultura i Siensia (OCW).
E evento tabata un éksito grandi. Durante esaki partisipantenan a papia na un manera
honesto i tambe emoshonal tokante nan eksperensianan i e impakto di ta òf kria un Yu sin
doló’ riba nan bida. A skucha fragmento di Nicole Terborg su pòtkast 'Kweekje', despues e
ekspertonan di eksperensia Mimi Frans i Shaedra Baromeo a hiba palabra i públiko a
haña oportunidat pa hasi pregunta. Esaki a kondusí na interkambio balioso di storia,
konseho i idea. Na final di e nochi tabata kla ku e sala yen ker a sigui papia i konta
tokante e tópiko.
Pa komprondé e konsekuensianan mas profundo di ta òf kria un Yu sin doló, biblioteka a
pèrkurá ku ku sikiater di mucha Eugenie Curiel tabata presente komo eksperto.
Pa futuro e sikiater a mustra ku ta bon pa mucha sa dikon mayor a konfia kriansa na otro
persona òf famia. Rechaso i tristesa ta tópikonan ku mester diskutí.
E evento tabata un promé paso pa haña mas konosementu di nos diáspora afrikano i
testigunan di nos historia i kultura komun.
Biblioteka ta bai sigui organisá e tipo di eventonan akí i ta hasi un yamada tambe na otro
organisashonnan kultural i sosial pa yega na kolaborashon bunita pa komunidat di
Boneiru.
