Prome Minister demisionario Evelyn Wever Croes tabata presente na reunion cu gobernador y na su salida di e reunion cu ta parti di e proceso di informacion, MEP ta e prome partido cu a keda invita. E combersacionnan mas bien ta pa duna gobernador un indicacion kico ta loke MEP ta para pe, kico ta dispuesto pa yega na compromiso cu ne, kico pa MEP ta importante den un formacion como e partido di mas grandi.
Prome MInister Evelyn Wever Croes a duna di conoce cu e combersacion a bay bon no mas cu e contenido ta keda secreto. E mandatario ta gradici tur e 20701 sostenedonan cu a yuda MEP gana e eleccion y cu a haci partido MEP e partido di mas grandi di Aruba un biaha mas.
Por bisa cu gobernador tabata kier scucha for di tur esunnan invita con ta mira e resultado di eleccion, y aki pueblo a papia cla unda cu e kier mira partido MEP den gobierno no mas cu otro partnernan den coalicion y esey ta loke cu e partidonan ta buscando.
Segun prome minister Evelyn Wever Croes partido MEP tabata hopi honesto y a splica cu partido AVP ta para pa principionan cu MEP no ta para pe. AVP ta para pa principio di duna forsa na corupcion y MEP ta combati corupcion .
Por mira claramente na momento cu nan ta duna forsa na un persona cu ta cera na prizon na e momentonan aki y tog ta opta pa lage riba lista, pero no ta solamente a lage riba lista pero a bay na defende y purba propagande pa kico hende mester vota pe, esaki ta cosnan cu ta un berguensa pa partido MEP y no solamente como lider politico, pero como un Arubiano mes.
Tambe loke cu ta mas bergonsoso ta cu nan ta bay ataca institutonan importante manera un ministerio publico , landsrecherge unda cu nan ta ataca y ta bisa cu voz halto na momento cu nan haya chance nan lo bay desmantela nan.
Segun Prome MInister Evelyn Wever Croes tin algun cosnan cu ta principal cu AVP a trece padilanti cu ta pone cu pa MEP ta bira sumamente dificil pa contempla nan como un partner . Sinembargo MEP ta kere cu den un democracia mester tin balans y na momento cu no tin oposicion grandi bo no tin balans.
Segun prome minister siendo cu tin un partido grandi den gobierno y un partido un poco mas chikito den categoria mediano den oposicion e ta trece balans y esey ta significa democracia . Prome minister demisionario no ta kere cu e problemanan di Aruba ta keda soluciona si MEP y AVP traha cu otro, problemanan di Aruba ta keda soluciona si tin gobernantenan cu tur ta wak e mes un direccion.
Kisas den futuro na momento cu AVP ta para pa principionan liña cu esunnan di MEP lo no tin e problema pa traha hunto, debi cu awor aki e problema ta grandi. Na e momentonan aki e bandera politico no tin balor mas, pero e bandera di Aruba y Aruba ta den un situacion hopi delicado unda cu e pandemia a siña nos tur hopi cos y tin hopi scenarionan cu a pasa unda cu a uni Aruba completo y principionan di norma y balornan ta hopi importante. Esaki ta conta pa cualkier partido grandi of chikito y si nan tin otro principionan y otro puntonan di salida cu un otro partido no por forsa nan traha cu otro paso tin gana di ta uni.
Segun Prome Minister demisionario un matrimonio cu ta forsa dos hende cu no ta alinea cu otro, pa nan bay biba hunto y crea un hogar hunto e no ta bay. Mirando cu tin tres partido, dos cu dos asiento y uni cu un asiento e no ta bay pa e persona e no ta bay pa e color di e partido pero e ta bay pa e programa.
Na e momentonan aki loke cu ta pasando ta cu ta aliniando tur e programanan pa asina mira cua ta mas similar cu otro y na unda cu tin puntonan cu ta contrario di otro ta bira dificil pa por yega na un coalicion. Un programa di partido ta e punto di salida di e partido y di eynan ta mira si por traha cu otro.
No ta gobierno ta haci e proceso di informacion y formacion, pero como gobierno Prome Minister Evelyn Wever Croes ta kere cu mester por duna e proceso si su tempo pa e keda haci bon, pero lamentablemente no tin e luho di tempo. Aruba ta den un crisis ainda mester di continuidad unda cu tin Hulanda riba nos nek.
Pa fin di otro siman tin un parlamento nobo y ya caba ta bay haya un situacion cu un parlamento por ta un otro constelacion cu e gobierno y un situacion asina no lo por wante mucho largo. Na Hulanda un structura asina a wanta 7 pa 8 luna un 4 aña pasa y na e momentonan aki e ta durando un situacion asina.
Sinembargo aki na Aruba Prome MInister Evelyn Wever Croes no ta kere cu un situacion asina no ta traha bon. MEP ta mas uni cu nunca y e partijraad cu a tuma luga diasabra ultimo a bay hopi bon unda cu e animo ta hopi halto.
MEP completo ta sinti sumamente agradecido cu votadornan di MEP cu a sostene MEP y a permiti MEP mantene e forsa. MEP a goberna 3 aña y 9 luna unda cu a tuma decisionnan hopi dificil pa pueblo. Esey kiermen cu den un posicion asina ta spera cu lo bay atras, pero esaki no a tuma luga.
Banda di esaki tin 11 otro partido pa competi cu ne unda cu tur a come di MEP pero tog MEP a wanta su forsa y pa e motibo aki mes MEP ta hopi hopi contento y agradecido na tur e sostenedonan.
E situacion di Sra Lopez Tromp manera cu e la pasa aña pasa na october tabata un situacion cu cierto momento mester a haci loke mester a haci. Segun prome minister Evelyn Wever Croes mi persona no tabatin ningun problema cu Marisol Lopez Tromp e tabata bin na mi persona na momento cu ta constata cosnan cu no ta bon y hasta mi persona tabata consehe kico pa haci y cosnan cu e no tabata por a haci su mes mi persona tabata yude.
Sinembargo e situacion a complica su mes na momento cu e tabata den parlamento y unabes cu su fraccion a kita sosten for di dje pa MEP tabata hopi importante pa por papia y mira con lo bay sigui.
Sinembargo na momento cu a yama Marisol Lopez Tromp pa presenta pa por papia pa por compronde con lo bay atende cu e situacion marisol lopez tromp no a bin, a pasa tres dia largo e no a presenta. Na momento cu esey a sosode esey a haci e situacion cu no por traha cu marisol lopez tromp.
Si acaso marisol lopez tromp kier traha cu MEP ta importante e dianan aki. MEP ta dispuesto pa traha cu tur partido no ta trata di persona cu persona pero e ta trata pa e pais na e momentonan aki. Ta importante cu e partidonan duna di conoce di nan banda cu cua partido nan lo kier bay traha, kico ta e condicionnan cu nan kier bay pone y e ora por mira unda cu por yega.
