Mas di 5000 mama y tata di famia ta anhela di haya 5% di salario
Prome Minister Evelyn Wever-Croes den un reaccion riba lider di partido AVP Mike Eman, a extende un invitacion na Eman pa yuda combati pobresa.
“Nos Gobierno ta luchando contra pobresa y tur e problemanan social desde e prome dia di nos Gobierno na 2017. Despues cu e sector social a wordo totalmente neglisha pa e gobierno di Mike Eman cu a prefera di inverti den klinker cu den e ser humano. Momento cu nos a drenta den Gobierno nos por a mira un explosion di problemanan social y mesora a bin cu e Sociaal Crisis Plan. Pa prome biaha den historia un gobierno a pone 32 miyon florin un banda pa combati pobresa y combati problemanan social. Profesionalnan den veld social tabata sumamente contento cu e sector aki porfin ta haya atencion di un gobierno. Nos compromiso desde e prome dia, ta pa yuda esnan mas vulnerable.
Y nos tabata bayendo bon. Lamentablemente e pandemia mundial Covid-19 a cambia tur cos. Henter mundo a wordo sacudi cu perdida di entrada. Ora porfin nos a cuminsa sali di e crisis di Covid-19, nos a haya nos cu otro crisis, guera na Ukraina cu a causa aumento di prijs rond mundo. Esaki tin su efecto riba Aruba tambe.
P’esey, awor nos Gobierno ta trahando cu alma y cuerpo pa logra paga e 5% bek na empleadonan cu ta traha den gobierno y na fundacionnan cu ta traha den e sector social y di cuido. Pa logra esaki, Parlamento mester trata e ley di Wever-Croes-Norm. Un ley cu a bin pasobra cosnan a sali for di man bou di gobiernonan anterior y a permiti salarionan hopi halto. Companianan estatal no ta priva, nan ta di Gobierno y mester sirbi pueblo.
Cu den cierto compania estatal tin hende ta gana riba 20 mil florin, no ta normal. P’esey ta bin un norma, un maximo di un entrada di 261.000 pa aña, cu ta entre 17 y 18 mil florin pa luna. Esey ta 130% di salario di un minister.
Hulanda a pone como condicion pa Aruba paga e 5%, cu e ley di Wever-Croes-norm mester drenta na vigor. Awor Parlamento tin e ultimo palabra: ta vota na fabor di e ley y duna mas di 5000 empleado cu ta gana entre 2 mil y 5 mil florin 5% extra tur luna? Of ta vota contra e ley pa permiti 20 hende sigui gana mas cu 20 mil florin pa luna riba lomba di pueblo.
Mi ta invita sr. Mike Eman, si realmente bo kier yuda combati pobresa, vota na fabor di e ley y bo ta yudando mas di 5000 mama y tata di famia”.
