Parlamentario drs. Mervin Wyatt-Ras a trece padilanti, durante conferencia di prensa di Partido AVP, cu Evelyn-Wever-Croes diabierna “Friday the 13 th” di november 2020 a bende Aruba su autonomia riba mercado Hulandes. Wyatt-Ras ta lamenta esaki. Minister Evelyn Wever-Croes a subi avion bai Hulanda su so, mientras su colega di partido Vrolijk a bisa den prensa cu su lider no ta bai Hulanda. Of e ta gaña of su lider no ta informa ni nan cu ta di su partido. Despues cu Wever-Croes a firma cu Hulanda e tabata den un conferencia di prensa, hunto cu minister Knops di Asuntonan Interno Hulandes. Awor e pamfleta cu nan partido a traha y a reparti na tur politico na Hulanda, hasta na e “visboer” cu ta bende pisca pafo di Tweede Kamer, lo wordo ehecuta. E pamfleta titula: “feestvierend ten onder gaan” a papia y pidi malo pa Aruba, awor nan mes ta haya nan mes ta ehecut’e. A malinforma politiconan hulandes y awor nos ta haya nos mes cu e “gebakken peren”.
Segun Wyatt-Ras su mama semper a bisa “no skupi na halto sino e ta cai den bo mesun cara of boca”. Asina a pasa loke nan a critica otro di dje a cai pa nan mes paso nan a spera cu e tempo ey Hulanda lo a tuma medida pa cu AVP pero el a cai pa nan mes. Ta tristo cu nos ta bai haya nos confronta cu 2 “Rijkswet” of ley di Reino. Por bisa 2 ley di Reino cu no lo ser pasa ni aproba aki na Aruba, sino den tweede kamer na Hulanda. Dor di otro parlamentario cu no ta nos, pues e controle no lo bai ta di nos Parlamento.
E controle no lo ta den nos pais. E control ta bai ta ayanan na Hulanda y dor di Tweede Kamer.
Un di e leynan aki ta e Rijkswet Financieel Toezicht (RAft).
Segun Minister Presidente esaki ta un ley cu a keda mescos cu e LAft. Pero si esey ta e caso e ley aki no lo a ser trata na Hulanda sino aki na Aruba. E otro ley di Reino ta “het Caribisch Orgaan tot Hervorming en Ontwikkeling (COHO). Segun Wyatt-Ras di CHE ela bira COHO, pues enbes cu nos pais ta cana nos lo bai coha. Por a compronde cu esaki ta un entidad cu lo ser maneha dor di tres persona cu no ta djaki. For di Hulanda ta bai maneha e entidad aki. For di Hulanda lo maneha nos departamentonan gubernamental ariba diferente tereno y lo bai cumpli cu diferente condicionnan y tuma medida. Den pasado Gobierno di AVP a cumpli cu condicionnan cu Hulanda a stipula. A tene nos mes na e diferente “begrotingsnormen” y diferencia di opinion tabatin naturalmente, paso Hulanda semper tabata kier mas. Awor cu nos pais a ser confronta cu COVID y mester di yudansa, Hulanda ta pone yen di condicion pa por duna yudansa financiero.
A sabiendas di esaki gobierno di Aruba of Minister Presidente mester a para mas fuerte, e mester a para mas pa interes di henter nos comunidad. Bo por imagina nos libertador Betico Croes, e tempo cu el a lucha pa nos Status Aparte a hiba tur e diferente politiconan hunto cun’e Hulanda. El a bai cu full un delegacion ayanan regla e Status Aparte pa Aruba. Contrario na esaki, e Prome Minister aki ta hinca nos den un situacion of sea cu “un voldongen feit”. E no a consulta debidamente cu nos pueblo. Ni cu su Caciquenan, kendenan ta weso di lomba di partido MEP e no a consulta cu nan. Pues e no a consulta ni cu su “achterban”, manera ta yama esey. Ora el a yama gremionan tambe tabata a base di loke e tabatin tin caba como proposicion. Durante encuentronan virtual el a splica nan su proposicion cla caba y nan por a haci par di pregunta so, pero masha cortico mes. Lider di AVP a ofrese di ta parti di e deliberacion, mientras e promer minister no a ni reacciona. Ex-lider di AVP no tabatin mester di tapijt corra. Solamente e por a duna un bon contribucion na deliberacionnan.
Enbes cu e Minister Presidente a bai cu diferente politiconan di Aruba direccion di Hulanda pa discuti cu Hulanda y pa para Hulanda encuanto di e inhusticia aki, el a skohe pa bai su so.
Dor di e dos leynan di Reino, Parlamento di Aruba lo tey “voor spek en bonen”. Pues Parlamento no tin nada mas di bisa.
Awor ken ta e traidor? Ken a bai Hulanda, entrega tur locual nos antepasadonan a logra na derechonan fundamental cu nos pueblo tanto a lucha pe? Tanto aña di autonomia a ser entrega den un sera di wowo y dor di un solo persona: Evelyn Wever-Croes.
Pakico Wyatt-Ras ta bisa esey ta pasobra COHO, manera ta yam’e, ta traha independiente: “kan zelfstandig projecten initieren”. COHO no tin cu delibera ni cu gobierno ni cu parlamento. Tambe “bevorderen en danwel uitvoeren, subsidies verstrekken aan burgers en bedrijven. Kiermeen di su mes e por duna subsidio na cuidadanonan y empresanan. “Met inbegrip van overheidsbedrijven kan deelnemen aan aandelen kapitaal van bedrijven”, pues COHO por tin shares of parti den empresanan. En todo caso e tin outoridad riba su mes. E asunto aki ta condenabel.
Fraccion di AVP a trece esey padilanti den parlamento, pero no a haci caso y te hasta e parlamentarionan di fraccion di MEP cu a expresa nan mes fuerte na defensa di nos autonomia anteriormente a bai di acuerdo cu e carta cu gobierno a manda Parlamento pa pidi gevoelens di Parlamento al respecto.
P.e. lider di fraccion di MEP, Sr. Rocco Tjon, dia 6 y 8 di juli 2020, a trece padilanti den prensa cu e no lo accepta condicionnan di Hulanda. Tambe ela a expresa cu e proposicion di Hulanda pa tres Hulandes goberna e islanan no ta acceptable. Sr. Vrolijk, sr. endy Croes y sr. Ady Thijsen tambe a expresa nan descontento pero ora nan por a duna nan opinion durante e reunion di Comision Central cu e Ministro Presidente nan a cambia di idea.
Durante e conferencia di prensa, hunto cu Secretario di Estado Knops, sra. Evely-Wever-Croes a declara: “de entiteit heeft geen landsbevoegdheid en COHO staat naast Aruba”. Knops al contrario a trece padilanti durante e mesun conferencia di prensa: ”COHO kan ingrijpen. COHO is om toe te zien. COHO staat niet naast de overheid”. Kiermeen COHO ta para riba gobierno. Kizas sra. Evelyn Wever-Croes kier a suavisa e cuenta y un biaha mas gaña pueblo. Pero Knops a coregi esaki.
Hecho ta cu nos ta bai haya nos cu un situacion caminda cu nos tin cu bai entrega. Pues ta bai corta den presupuesto di pais Aruba paso e “landspaketten” ta consisti di medidanan.
Hasta riba e tereno di salubridad y riba e tereno di enseñansa lo bai tin medida. Ta dos tereno cu tabata “landsbevoegdheid”. Ya caba nos a haya un “Landsbesluit” den Parlamento cu ta indica cu lo bai kita medicinanan foi riba “positieve lijst”. Niun hende no a hik, ni un hende no a cuestiona. A corta caba den patientnan pa loke ta trata djente falso y ranca djente. A corta den transporte den patientnan di dialyse. Hulanda a bisa bon cla cu e leynan ta bai Raad van State pero ta bai cuminsa caba cu “uitvoering” pues ta cuminsa implementa medida promer cu haya e conseho. Esaki ta un situacion inacceptabel. Tanto cu e minister di finanzas actual kier a manda Sweety riba ex-Promer Minister, Mike Eman, awor Sweety a bira morde nan mes. Hecho ta cu nos a perde nos autonomia na man di Evelyn Wever-Croes.
