Gobièrnu di Sint Eustatius i EUTEL N.V. a logra yega na un akuerdo atraktivo ku ‘Saba Statia Cable System B.V.’ (SSCS B.V.) pa kapasidat di internèt pa e sinku añanan benidero. E Ministerio di Asuntu Interior i Relashon den Reino (BZK) ta doño di SSCS B.V.. Esaki ta resultá den mas kapasidat di internèt, na kosto mas abou. Den e lunanan benidero lo establesé konekshon direkto entre Statia i Miami, loke ta un konekshon internashonal di internèt, kaminda kapasidat di internèt ta hopi mas barata. Statia lo ta konektá via di dos ruta pa Miami pa asina si un konekshon kai afó, e otro ta tuma ofer. Esaki ta e asina yama ‘redundansia geográfiko’.
Asina e konekshonnan direkto pa Miami ta establesé, probablemente den komienso di 2021, tur hende na Sint Eustatius lo benefisiá di esaki. Lo transferí e benefisionan finansiero di e dil aki kompletamente pa e kliente i negoshinan di Statia. Tur pakete pa konsumidó lo risibí un redukshon for di e tarifa mensual i tur konekshon lo risibí spit konsiderablemente mas haltu ku loke aktualmente ta e kaso. Mas lat den e aña aki EUTEL N.V. lo publiká e spit i tarifa nobo di e paketenan. Ademas e spit haltu aki ta hasi posibel pa EUTEL N.V. por sòru pa televishon di kalidat mas haltu. E redukshon di preis aki ta adishonal riba e oumento di e supsidio mensual di Gobièrnu Hulandes di $25 (2020) pa $35 (2021) riba tur konekshon di internèt na Statia.
Gobièrnu di Sint Eustatius i EUTEL N.V. ta kontentu ku e redukshon di preisnan aki i e spit konsiderablemente mas haltu di internèt pa asina negoshinan i gobièrnu por traha mas efisiente. Studiante lo por studia for di kas, miéntras e konsumidó general lo por tene kontakto ku nan amigu i famianan den ekterior. Sekretario di estado di Asuntu Interior i Relashon den Reino, Raymond Knops ta responsabel tambe pa Informashon sosiedat i gobièrnu i p’esei ta kontentu ku oumento di posibilidatnan ku e akuerdo aki. No solamente Hulanda Oropeo ta dediká na e akseso na digitalisashon, pero tambe na Hulanda Karibense. A invitá Saba tambe pa probechá di e oportunidat aki.
Gobièrnu di Sint Eustatius i EUTEL N.V. a yega na e akuerdo aki ku yudansa di ‘Netherlands Telecom Consulting and Support’ (NTCS), un kompania di konsulta independiente, ku a sostené EUTEL N.V. den elaborá riba vários senario pa baha e preis di kompra i oumento di kapasidat di internèt drástikamente. Den e proyekto menshoná e partidonan a duna koperashon na SSCS B.V. E kompania aki ta operá e kabelnan supmarino ku ta konektá Statia ku Saba ku otro sistema di kabel supmarino riba e islanan bisiña Sint Maarten, St. Barts i St. Kitts.