Economisch Bureau Amsterdam hunto cu Sofiris a publica cu Aruba tin e miho clima di inversion den Caribe. Apenas 3 aña den gobierno, Gabinete Wever-Croes a elimina hopi red tape pa mehora e clima di inversion. Imagina bo 4 aña mas!”, to loke Prome Minister Evelyn Wever-Croes a expresa diamars mainta despues di a lesa e publicacion di Economisch Bureau Amsterdam.
Aruba tin e miho clima di inversion atractivo den Caribe. Especialmente e apertura di economia, e nivel di prosperidad y e fortalesa di institutonan ta contribui na e score halto di 71.1 di Caribbean Investment Climate Index (CICI) di e paisnan den region. Paisnan cu tambe ta inclui den e evaluacion aki ta entre otro; Bahama, Greneda, Sint Lucia, Corsou, Antigua y Bermuda, Puerto Rico, Saint Kits & Nevis, Dominica, Barbados, Republica Dominicano, Jamaica, Saint Vincent & Grenadines, Trinidad & Tobago, Cuba y Haiti. Corsou tin un score di 56.3 y ta na di 5 luga den e evaluacion mientras cu e score di mas abou ta di Haiti cu 26.5.
“Esaki ta resultado di determinacion y vision, resultado di trabou duro di un ekipo grandi di persona cu ta trahando riba recuperacion economico di nos pais. Nos no ta ainda caminda cu nos mester ta, pero nos ta riba e bon caminda”, Prome Minister Evelyn Wever-Croes a expresa.
