Aruba tin problema serio cu sushi den caya principal. No ta trata di sushedad so , pero e adictonan ambulante un biaha mas ta activo den caya principal y ta laga situacionnan amargo atras. Banda di cu tin personanan cu supuestamente sa miho ta benta sushi unda cu ta den caya principal, esaki ta muestra cu Aruba tin un problema cu su mentalidad y comportacion cu ta cambiando drasticamente.
City inspector y serlimar ta haci nan best mirando cu nos ta un isla chikito y ta biba di turismo, pero cada un di nos como ciudadano mester ta mas consciente di kico ta bon y kico ta malo y haci bon pa bo mes y ta un ehempel y principalmente pa bo pais cu bo ta biba den dje.
Ta inaceptabel cu no ta atende cu e problemanan di adictonan ambulante y nan ta keda drumi riba caya y ta haci tur nan desperdicio humano unda cu ta den caya principal unda cu turistanan ta bishita, esaki ta un berguensa cu Aruba no por hendel y atende cu e problematica aki cu pa aña nan largo ta papia di dje, tur cos ta keda na papia pero e actuacion mes ta 0.0.
Mester bisa si cu City Inspector ta haci hopi bon trabao, pero e no ta solamente deber di city inspector , pero e ta deber di nos tur cu ta biba riba e pida baranca aki pa haci e cosnan corecto.
Na momento cu a raporta e situacion cu a topa den caya principal mester bisa si cu City Inspector a tuma e decision y a actua mesora y a haci tur e partinan aki limpi. Awor nos como ciudadanonan ehemplar y cu ta stima e pida baranca aki , ban keda yuda City Inspector y keda mantene e partinan aki limpi, asina tambe por keda yama mas turista bon bini na Aruba.
