MI persona como lider di partido CURP@ a haya e invitacion di e lider di avp pa reuni y hiba un discurso durante un reunion. Mi a reuni internamente y a haya e apoyo pa acudi 22 di augustus 2022 y mustra cu partido CURP@ ta para banda di partido avp paso nos no por cu mas medida. Partido CURP@ su unico meta comun pa e reunion aki ta cu nos ta conciente cu nos tur (pueblo) ta sufri pa causa di e medidanan. E aumento di bbo aki ta hasi cu nos tur ta bai paga 22.5% na bbo y nos pueblo ta biba den un miseria caba. Nos pais ta den un guerra contra di tur medidanan paso nos no tin mas espacio pa mas medida. Bo no por cumpra cu un cartera bashi. E medidanan aki tin un peso riba henter pueblo di Aruba. Medida no tin color politico sino nos tur ta sinti’e.
E hecho cu partido CURP@ a accepta e invitacion, parce di a causa un guerra contra partido Curp@ di parti di nos oponentanan politico. Partido CURP@ ta compronde e motibo pakico ta critica e accion di reuni cu avp paso no lo tarda mucho pa e gobierno aki bay cas, pero partido CURP@ ta conciente cu awor aki ta necesario pa hasi un empeño pa yega na un concensus politico cu lo por trese un cambio radical di e forma cu nos pueblo ta wordo goberna. Partido CURP@ sinembargo no lo laga bou di ningun circunstancia su principionan Cristian cay.
Yega na un concensus ta rekeri cu mester acudi cu un mente habri pa por delibera cu otro partidonan politico. Esaki cu e unico meta pa sirbi y defende e derechonan di nos pueblo. Hasta partido mep y partido avp a brasa otro dia 8 di September 2016 tempo cu pa prome biaha a trese e amienda 7 caminda despues di a tira matrimonio di mesun sexo den bari sushi despues pa cambi’e pa geregistreerd partnerschap. Dia 1 di maart 2021 partido avp y partido mep a bolbe brasa otro pa acorda e codigo civil nobo caminda e registreerd partnerschap a wordo legalisa. Nos por corda cu no tabata tin corahe pa subi caya pa para contra e derecho civil aki. Nos di partido CURP@ si tabata presente y lo sigui para duro.
Parce cu a cuminsa tene cuenta cu e interes Cristian cu partido Curp@ tin como base di su principionan politico paso nos partido nunca nos a haya asina tanto atencion. Esaki ta duna nos di compronde cu e color biña a cuminsa pone hende cuminsa haya nachtmerrie y no por drumi anochi. Relax no hoga den un glas di awa pa un simple reunion cu no ta mara nos na nada. Dia cu durante di reunion di Parlamento a pasa tur e medidanan, e dia ey tabata tin un motibo real pa hasi desordo paso e ta toca nos tur nos cartera. E reunion aki no ta ni hasi dolor manera prikje.
Nos tur ta conciente cu despues di 2 temporada di gobernacion partido mep lo no bolbe mas den gobierno. Seguramente lo e hasi dolor paso e galiña cu ta pone e webo di oro no t’ey mas. Mas pio ta cu despues di a bati riba su pecho di a logra Status Aparte, e mesun partido aki a hiba nos den un tempo pio cu 12-8 y pio cu den tempo di Curaçaose Kolonie. E ta keda graba den historia e diabierna scur di 13 di November 2020 cu a bende Aruba na un prijs di baca flaco. Despues di a grita cu lo goberna sin medida a bin resulta cu nan plan di gobernacion ta basa solamente riba medida. Un partido raiz cu a bay cu votonan di partido avp den un proximo eleccion lo keda sin asiento paso ta votadornan cu lo no vota pa partido mep y partido raiz a decepciona nan votadornan. Partido Mas a bay cu e votonan di partido por.
Esaki ta e tempo cu si pueblo no kier ni partido mep ni partido avp anto a yega tempo pa duna partido Curp@ e forsa pa trese cambio pa nos isla. Gran mayoria ta kere cu e proximo gobierno ta uno di coalicion. Nos di partido Curp@ no tin representante den nos Parlamento pero cu ayudo di nos bon Dios y di nos pueblo, nos ta spera di por ta digno di por haya representantacion den parlamento den e proximo eleccion. Ora e husto goberna e pueblo lo alegra. Nos ta un partido cu tin temor di Dios y no kico e hende por hasi nos. Un pueblo uni ta un pueblo cu lo sali victorioso.