Hopi turista ta bini Boneiru pa sambuyá i gosa di naturalesa. Pa Boneiru turismo ta e fuente mas prinsipal di entrada. Nos naturalesa riba tera i bou di laman ta forma base di nos ekonomia.
For di investigashon ta resultá ku tin 32.000 kabritu na Boneiru. Un gran parti di esakinan ta kana rònt i no ta será den kurá.
Riba enkargo di Entidat Públiko Boneiru Universidat di Wageningen a hasi investigashon relashoná ku krio di kabritu. For di e investigashon a resultá ku krio di kabritu manera ku e ta awor aki tin tiki futuro: e ta produsí solamente karni pa stoba i e entrada ta abou. Un gran parti di e kunukunan ta bandoná, di manera ku e union sosial den área di kunuku a disparsé. Tin problema tambe ku ladronisia i kachó di mondi.
Pa ofresé krio di kabritu un futuro atrobe, e investigadónan a traha un plan di aserkamentu pa profeshonalisashon di krio di kabritu. E meta ta pa krea un situashon kaminda di ámbos banda tin ganashi, pa medio di un kombinashon di ekonomia i ekologia: fortifikashon di krio di kabritu i tur kabritu den kurá. Pa fortifikashon di krio di kabritu ta bai traha riba renobashon di e matadero, produkshon di kuminda pa bestia, mehorashon di rasa, produkshon di karni di karné, maneho di kabritu i siguridat.
Den koperashon ku Departamentu di Agrikultura, Krio di Bestia i Peska (LVV) a kuminsá ku e proyekto Krio di Kabritu Profeshonal bou di guia di mènedjer di programa Olaf Creutzberg. Sherwin Pourier i Weero Koster ta lidernan ehekutivo di proyekto pa e proyektonan en kestion. Direktorado di Planifikashon i Desaroyo ta responsabel for di Entidat Públiko Boneiru.
