Awe ta un dia spesial. Entidat Públiko Boneiru (EPB) i Fondo Mundial di Naturalesa a ofisialisá nan intenshon pa koperashon pa medio di firmamentu di e Memorandum of Understanding.
Na nòmber di Entidat Públiko Boneiru diputado James Kroon a firma e Memorandum of Understanding. Despues di diputado Kroon CEO Kirsten Schuijt a firma na nòmber di Fondo Mundial di Naturalesa. Fondo Mundial di Naturalesa ta dediká su mes na protekshon di naturalesa, na Hulanda pero na nos islanan tambe. Na Boneiru den pasado e organisashon ya kaba a ofresé sosten ku skirbimentu di un plan di akshon pa un insidentenan ku Sargassum, ku konsientisashon tokante efektonan dañino di krema kontra solo pa nos koralnan i ku konsientisashon pa loke ta trata e efektonan dañino di plèstik desechabel na nos isla. Esakinan ta solamente ehèmpelnan di un koperashon plasentero i ámbos partido ta anhelá pa kontinuá ku esaki riba e mesun bon pia, ku otro tópikonan tambe.
