ORANJESTAD,Aruba
Recientemente a tuma luga na Parke National Arikok, clausura di e proyecto Name the Exoplanet 2019. Esaki en conexion cu celebracion di 100 aña di existencia di International Astronomical Union. (IAU)
E anochi a cuminsa cu un splicacion corto di e trayecto di e proyecto, desde cu a anunci’e. Pueblo a propone un total di 33 nomber cu ta representa nos dushi pais Aruba. E proposicionnan ricibi a pasa door di un comite nacional di hurado cu ta consisti di dos arkeologo, un docente di Papiamento y un artista local. A selecciona un total di 11 nomber y e pueblo Arubano por a deposita nan voto. Dia 17 di December na Paris IAU a anuncia e nombernan di tur e 182 paisnan cu a participa.
Durante e anochi Space and Nature Aruba Foundation (SNAF) a gradici IAU pa nan confiansa pa permiti SNAF organisa un evento asina impactante pa Aruba.
SNAF a sigui pa gradici tur instancia cu a duna nan aporte pa cu e proyecto aki. Esakinan ta lo siguiente: Aruba Airport Authority, Bright Bakery, Colegio San Antonio, Crown, Parke National Arikok, Sams, Sensey Sushi Bar, Setar, Stipglas y Web Aruba NV.
Tambe a duna e cuerpo di huradonan un cariño chikito pa nan trabou cu nan a desplega pa cu e proyecto aki.
Por ultimo a entrega e ganadornan nan merecido premionan. E vice-president Jairo Vrolijk a duna un splicacion interesante di e nomber ganado absoluto cu lo tin un impacto grandi pa pais Aruba. Cualkier discubrimento cientifico cu haya riba e planeta of rond di e solo e nomber di Aruba su beachnan lo resona mundialmente den e area cientifico.
E nombernan ganado pa Aruba ta lo siguiente:
Na prome luga: Nomber di strea: Malmok. Nomber di exoplanet: Boca Prins, proponi pa Roselly Everon
Na di dos luga: Nomber di strea: Trom, Nomber di exoplanet: Bongo proponi pa Nando Mullers
Na di tres luga: Nomber di strea: Caiquetio. Nomber di exoplanet: Crioyo proponi pa Ronaly van der Biest
Despues di entregamento di premio tabatin e oportunidad pa pasa wak e exposicion cu lo keda pa 2 siman na Parke nacional Arikok.
