Entrega di sertifikado na partisipantenan di kurso ‘meldkamer’

Kuater kolaboradó di ‘meldkamer’ di Kuerpo Polisial Hulanda Karibense (KPCN) i dos empleado di Kuerpo di Bombero Hulanda Karibense (BKCN) sekshon Boneiru na luna di novèmber último a sigui un kurso intensivo di un siman tresé pa Oppstap Zorg en Welzijn. E kurso tabatin komo meta pa sertifiká e koleganan di e ‘meldkamer’ komo sentralista.
Djaluna 20 di febrüari último, e partisipantenan ku a sigui e kurso a risibí nan sertifikado. Hefe di ‘meldkamer’, sr. Aishel Girigorie a enfatisá riba e importansia di e kurso; ‘E kurso aki ta kontribuí enorme na desaroyo di e ‘meldkamer’.
Pa promé biaha BKCN a partisipá na e kurso aki pa haña un impreshon di kiko ta e prosedura na momentu ku yamada di emergensia drenta na ‘meldkamer’. E partisipashon di BKCN den e kurso ta algu úniko ku ta kontribuí na mehorashon di e kolaborashon entre e partnernan.
E kursistanan a risibí nan sertifikado for di sr. Girigorie i hefe suplente i operashonal di KPCN sr. Ronald Zwarter den presensia di e komandantenan lokal di BKCN, Thammy Albertsz i Gravey Anthonij.