A base di e lei di deklarashon di kondukta, Minister di Hustisia por stipulá un montante pa gastunan atministrativo den kuadro di otorgamentu di un deklarashon di bon kondukta. For di 1969 e montante aki ta Naf 1,-.Sigur mirando e tempu ku a pasa, e kantidat di trabou, trahadónan enbolbí i gastunan atministrativo a oumentá. Despues di evaluashonnan kanando for di 2015/2016 bini ariba, a yega na un oumento general di Naf 25,–. Pa hóbennan menor di 18 aña i tambe personanan ménos pudiente registrá na SOAW esaki ta mitar di preis, esta Naf 12,50.
Den Reino, Kòrsou no a subi e gastunan for di 1969. Na Aruba, e gastunan ta Awg. 40,-,Boneiru US$ 10, St Maarten Nafl 50,– i na Hulanda € 33,85/€41,35.
For di 2016 tin un kolaborashon entre Ministerio di Hustisia i Lokèt di Pèrmit bou di Ministerio di Maneho di Gobernashon, Planifikashon i Servisio Públiko, pa trata petishon pa un deklarashon di bon kondukta. Lokèt di Pèrmit ta tuma e petishon i ta manda esaki ofisina di Prokurador General. Na ofisina di Prokurador General e investigashon ta keda hasí pa risibí informashon si e persona a yega di tin kontakto ku Hustisia. Na momentu ku for di e investigashon resultá ku un persona nunka ántes a yega di bini den kontakto ku Hustisia, ta notifiká esaki na Lokèt di Pèrmit i un deklarashon di bon kondukta ta keda otorgá. Den kaso ku resultá ku e persona, di un òf otro forma a yega di bini den kontakto ku Hustisia den Reino Hulandes, e informashon aki ta keda mandá pa e departamentu konserní na Ministerio di Hustisia pa evaluá si e persona apesar di a bini den kontakto ku Hustisia por bini na remarke pa risibí un deklarashon di bon kondukta òf nò. E evaluashon aki ta tuma lugá di akuerdo ku un maneho estrikto, teniendo kuenta kue tempu ku a pasa despues di e kondena, resosialisashon, rísikonan pa e persona i sosiedat.
Tin diferente invershon a wòrdu hasí kaba pa por laga e proseso kana mas lihé. Apesar di esaki, dor ku e kantidat di petishon ku ta drenta ta oumentando i e kantidat di trahado si a keda meskos, ainda no ta tur biaha ta logra otorgá un kontesta den un tempu kòrtiku.
Ku e oumento di tarifa di tarifa aki lo por sigui hasi invershonnan pa hasi e proseso mas lihé dor di digitalisá esaki mas tantu. En espera di esei, e kadena di Lokèt di Pèrmit, Ofisina di Prokurador General i Ministerio di Hustisia, ta den deliberashon kontinuo pa mas tantu posibel hasi e tempu di espera mas korto.
Ministerio di Hustisia i di Maneho Gobernashon, Planifikashon i Servisio Públiko i tambe Ofisina di Prokurador General lo sigui hasi tur loke ta na nan alkanse pa keda mehorá e servisio na nan klientenan.
