Dia 1 di yüli 2024 e promé tres kambionan despues di evaluashon di e impuesto di turista ta drenta na vigor. Ta laga e kambionan akí drenta na vigor den un forma akselerá, di manera ku e yunan di nos isla ku no ta biba na Boneiru, ya kaba for di e vakansi grandi akí por probechá di e tarifa abou. Por haña mas informashon tokante e dokumentunan di prueba rekerí riba https://bonairegov.com/pa/habitante/impuesto-di-turista Wak pa bo ta bon informá, pa motibu ku sin e dokumentunan di prueba korekto bo tin ku paga e tarifa di $ 75.
E yunan di nos isla ku no ta biba na Boneiru
E yunan di nos isla ku no ta biba na Boneiru ta bai na e tarifa abou di $ 10 pa persona. Por haña e definishon di yu di nos isla den e diagrama di fluho di IND. Ku un pasport òf akta di nasementu òf ku un Deklarashon Di No Aplikabilidat bo por proba ku bo ta un yu di nos isla. Por pidi e Deklarashon Di No Aplikabilidat akí online na IND. Si bo pidi esaki promé ku bo biaha pa Boneiru, e ora ei despues ku bo risibí e Deklarashon Di No Aplikabilidat bo por pidi un restitushon di $ 65 di e Impuesto di Turista ku bo a paga ora bo a yega Boneiru. Despues di 2 siman por bai buska e deklarashon personalmente na IND na Boneiru.
Eksonerashon pa tur studiante boneriano ku ta studia den eksterior
E eksonerashon akí ta eksistí kaba pa tur studiante boneriano, ku konforme e Lei di Finansiamentu di Estudio BES, tur aña den luna di sèptèmber ta risibí un deklarashon di eksonerashon via email. Awor ta amplia e eksonerashon akí pa studiantenan boneriano den eksterior, ku no a risibí un deklarashon di eksonerashon. E ora ei ku dokumentunan di prueba e studiante tin ku proba ku e ta hasiendo un estudo fultaim di minimalmente 1 aña i ku e no tabatin 30 aña ainda na momentu ku el a kuminsá ku e estudio ei. Banda di esaki e studiante tin ku proba ku e ta un yu di nos isla, òf ku por lo ménos un di su mayornan òf tutornan ta residente di Boneiru.
Tur QR-code ta bálido pa 1 luna
A prolongá balides di un QR-code te na 1 luna. Den e luna akí por bishitá otro destinashonnan, sin ku na entrada na Boneiru tin ku paga e impuesto di turista di nobo. For di e di dos biaha ta pidi un dokumentu di identidat pa kontrolá si e QR-code ta riba nòmber di e bishitante.
Kontròl manual di e dokumentunan di prueba na aeropuerto
Diputado Clark Abraham ta indiká ku e ta hopi kontentu ku a logra pa laga e kambionan drenta na vigor dia 1 di yüli 2024, di manera ku e yunan di nos isla e vakansi grandi akí kaba ta bini na remarke pa e tarifa abou. “Nos a hasi tur loke tabata na nos alkanse pa hasi esaki posibel den un forma akselerá. Konsekuensia di esaki ta ku e sistema ta rekonosé e kambionan sí, pero ku ainda no ta posibel pa upload e dokumentunan di prueba rekerí den e sistema. Awor por lo pronto ta kontrolá esakinan manualmente na aeropuerto òf den haf. Esaki por sòru pa algu di retraso, i nos ta gradisí tur hende pa nan komprenshon pa esaki.”
