Dialuna mainta a tuma luga e “soft opening” di un otro parti di e proyecto di renobacion y construccion di Dr. Horcio E. Oduber Hospital. E inauguracion oficial a tuma luga den presencia di Minister di Salubridad, sr. Dangui Oduber, hunto cu miembronan di Hunta di Directiva di HOH y tambe representante di SOGA. Colega sra. Ilse de Cuba cu tin 37 aña ta traha na HOH, di cual 20 aña como e cara na momento di drenta HOH, tabatin e gran honor di corta e cinta como simbolo cu a logra un “milestone” mas den e proyecto aki.
Di biaha a duna tur esnan presente un tour di e area nobo aki. Manera drenta ta topa cu bali di informacion, departamento di opname y mas. E cambio awo di mas grandi ta cu temporalmente a muda e entrada principal di HOH. Esaki pa motibo cu awo lo bay renoba e parti aki na Hospital. Esaki ta nifica cu si bo tin cu bishita hospital pa cualkier servicio di cuido lo mester haci uzo di e entrada nobo na Area A. “E entrada aki lo conectabo cu e edificio nobo (Toren B) pero tambe e edificio existente (Toren A)”, asina Ghislaine Gomes, cluster manager di Facilitaire bedrijf di HOH, a duna di conoce.
Lo tin borchinan indicando con pa yega diferente caminda. Si bo tin cu bay departamento di Radiologia, botica di Hospital y cafetaria tambe lo mester pasa via Area A cu ta completamente renoba pa yega eynan. Si bo no ta sigur nos tin coleganan cla para pa splica con pa yega e departamento cu bo tin cu bishita.
Danki special ta bay na colega David Janse, fisioterapista na HOH y den su tempo liber un artista. David ta e prome persona cu ta expone su obranan di arte den Area A pa tur bishitante sinti un esfera ameno y agradabel manera cu drenta e espacio aki.
Un mainta sumamente agradabel na unda sigur tur presente a haya amplio splicacion y por a mira e cambio grandi den e area nobo aki. Alabes contento cu a logra un “milestone” mas den e proyecto aki. Cu un espacio hopi mas amplio y mas departamento bao un solo dak e construccion y renobacion ta sigui den bon caminda. Na final di e proyecto grandi aki, Aruba lo tin un Hospital moderno cu lo por brinda miho cuido y di mas calidad na tur pashent.
