Djamars 24 di novèmber 2020, den oranan di mardugá, Sentral di Polis a risibí informashon
ku tabatin un kiebro den un establesimentu den área di Sta. Rosa. Kaminda ku antisosialnan
a bai ku basta merkansia den tres diferente outo, probablemente un di e outonan ta koló
kòrá di e marka ‘Volkswagen.
Alrededor di 03.20 or, e personal di UST durante nan patruya den área di Montaña Abou,
den Kaya Mabi, a bin topa ku e vehíkulo menshoná ariba, stahoná dilanti di un kas.
Den kurá di e kas tabatin algun persona maskulino, ku na momento ku nan a nota presensia
polisial, a sali na kareda.
Durante di un kontròl den e vehíkulo, e agentenan a bin haña diferente artíkulo ku
probablemente ta prosedente di e ladronisia ya menshoná. A konfiská e outo i e
artíkulonan.
Alrededor di 04.25 or, Polis a tene un entrada hudisial na e kas ku ta konsistí di dos (2)
bibienda.
Durante di investigashon na e bibiendanan, e agentenan a haña i konfiská; diferente
artíkulo prosedente di e kiebro menshoná, tambe droga, munishon, sèn kèsh i algun
artíkulo ku ta di importansia pa e investigashon.
Na e sitio a detené dos (2) sospechoso. Ta trata di; e hòmber T.S.C.K. di 28 aña di edat, i e
dama M.C.H.-B .di 67 aña di edat, ámbos nasé na Kòrsou.
Mas lat e hòmber H.A.H. di 23 aña di edat, nasé na Kòrsou a entregá su mes na Warda di
Reshèrshi na Garipituweg i a deklará ku e ta responsabel pa loke a keda hañá na e adrés
den kaya Mabi. Mesora el a keda detené.
A presentá e sospechosonan dilanti un fiskal ouksiliar. E dama M.C.H.-B, despues di
interogashon a rekobrá su liberdat i e otro dos sospechosonan a keda será pendiente di
mas investigashon.
Entrada hudicial cu tres detencion y a confisca diferente articulo
