KRALENDIJK,Bonaire
Lo atmití pasahero ku ta yega Boneiru riba djasabra 14 di mart ku avion di
KLM i TUI. E avionnan tabata na kaminda kaba ora e aprobashon ofisial di minister di
Infrastruktura i Maneho di Awa a alkansá e kompanianan di aviashon. Pa e motibu ei
Boneiru ta obligá pa laga e biaheronan drenta.
Salubridat Públiko ta kontrolá tur pasahero pa medio di un formulario ku pregunta. Ta
supliká hendenan ku no ta residente na Boneiru pa keda na nan adrès di fakansi.
Salubridat Públiko lo sigui e hendenan ku ta ku fakansi durante dos siman. Departamento
di Salubridat Públiko ta trahando riba un protokòl.
Dòkter lo saminá e biaheronan ku resultá di ta malu na aeropuerto. Ta konsehá biahero
ku tin keho pa bai den karentena. Si nan ta malu nan ta bai den isolashon. Tin un tim di
Kuido di Salú Públiko di diferente dòkter i bruder i zùster di Salubridat Públiko na
aeropuerto ku lo skrin tur biahero. Esaki ta nifiká ku lo entrevistá e pasaheronan i nan
mester laga nan informashon di kontakto atras.
Relashoná ku e vírùs di corona a proklamá Hulanda komo área di riesgo. For di tres or di
tramèrdia di djasabra 14 di mart minister a aprobá e petishon di gezaghebber pa sera
espasio aéreo pa buelonan for di Oropa. Por lo tantu espasio aéreo di Boneiru lo ta será
pa buelonan for di Oropa te próksimo aviso.
Te ku awor no a konstatá ningun kaso di vírùs di corona na Boneiru. Diariamente e Tim di
Maneho Insular (Eilandelijk Beleidsteam – EBT) ta monitoriá desaroyonan rònt di vírùs di
Corona. Nan ta hasi esaki konforme e reglanan di plan di kalamidat Boneiru i lei di
siguridat BES. E Tim di Maneho Insular ta tene pueblo di Boneiru na altura di e
medidanan ku nan ta tuma pa trata na sigurá salú di nos pueblo.
