Entidat Públiko Boneiru (EPB) a sera un akuerdo di supsidio pa 6 luna ku Fundashon Tienda pa Konsumidó Boneriano (FTpKB). EPB ta trahando estrechamente ku e direktiva pa reorganisá e fundashon. A palabrá ku den e periodo di 6 luna aki e fundashon lo bai reorganisá i tambe yega na un plan di akshon pa kumpli ku e metanan i tareanan pa kual e fundashon ta risibí supsidio di EPB.
Pastor Alex Senchi a keda apuntá komo mediadó pa yuda guia e proseso aki. E ta duna un man riba base boluntario i ta sostené e direktiva ku e reorganisashon. Den pasado Alex Senchi a kontribuí kaba pa restrukturá i pone FTpKB bèk riba pia. Entretantu e proseso ta kanando bon. Un di e stap nan ku a tuma kaba ta pa buska miembro nobo pa e direktiva.
Den kuadro di mehorashon di maneho finansiero, ultimo añanan EPB ta vigilá mas estrikto si organisashonnan ku ta risibí supsidio, ta kumpli korektamente ku e tareanan enkargá. Esaki ta pa sigurá ku fondonan di supsidio realmente ta duna un resultado benefisioso. P’esey tambe a tene basta kombersashon aña pasá ku e direktiva di FTpKB pa asina por a enfoká riba e metanan ku gobièrnu a pone pa fortifiká posishon di konsumidó.
Diputado di Asuntunan Ekónomiko Hennyson Thielman ta kontentu ku e desaroyo: “Ta di aploudí ku direktiva di FTpKB hunto ku e mediadó ta trahando duru riba e proseso di reorganisashon i ku esaki ta kandando positivamente, mirando e tarea importante ku e fundashon aki tin pa protehá i konsientisá e konsumidó Boneriano.”
