Awendia ta solamente posibel pa biaha ku avión for di Boneiru pa por ehèmpel Kòrsou. E idea pa un servisio di fèri entre e islanan ABC t’ei pa hopi aña kaba. Awor entidat públiko Boneiru ta investigá un biaha mas si un fèri entre Boneiru i Kòrsou ta faktibel i deseabel i ta hibando kòmbersashon ku diferente potensial proveedor tokante esaki.
Hopi habitante di Boneiru tin famia i amigu riba e islanan ruman. Pa e motibu akí transporte for di i pa nos isla ta èkstra importante. P’esei na e momentu akí entidat públiko Boneiru ta hasi un estudio di faktibilidat pa loke ta trata un fèri for di i pa Kòrsou. E regulashon i eksigensianan, i tambe infrastruktura, logístika i faktibilidat finansiero ta forma tópikonan importante di e investigashon akí.
Diputado Jolinda Craane ku ta enkargá ku ekonomia gustosamente ke tende di abo komo siudadano kiko e potensial servisio di fèri akí tin ku kumpli kuné i kiko bo ekspektativanan ta. Pa e motibu akí un konsultashon online ta bai tuma lugá. Tambe den forma di un prueba arbitrario nos lo aserká algun siudadano via telefòn, òf bo por yena un lista di pregunta serka nos na ofisina.
Ora ku finalisá e investigashon, ta evaluá kiko e siguiente pasonan lo ta. E ora ei entidat públiko Boneiru lo tene un destaho. Un destaho ta un proseso ku ta stimulá kompetensia hustu. E ora ei empresanan ku ta interesá pa den futuro operá un servisio di fèri, via un destaho por entregá nan plannan. Seguidamente entidat públiko Boneiru por hasi un eskoho.