Entidat Públiko Boneiru ta felisitá hóbennan di Boneiru riba dia internashonal di Hubentut

Anualmente, riba 12 di ougùstùs mundu kompleto ta selebrá dia internashonal di hubentut. Na aña 2009 Nashonnan Uní a adoptá un resolushon proklamando un dia Internashonal di Hubentut i a hasi un yamada na gobièrnunan i organisashonnan relevante na tur nivel pa pone atenshon na e posishon di hóbennan riba e fecha aki. 

Gobièrnu di Boneiru ta rekonosé e balor grandi di nos hóbennan Boneriano i ta pone atenshon na desaroyo i posishon den nos komunidat. Nos hóbennan a demonstrá hopi talento riba diferente area, manera deporte, músika òf arte of riba tereno empresarial. Ta importante pa ofresé nan e oportunidat pa desaroyá e talentonan aki i asina kontribui na desaroyo general di nos isla. Pa e motibu aki resientemente Entidat Públiko a revisá su maneho pa hubentut. Den próksimo tempu lo traha huntu ku partner nan stratégiko  pa duna kontenido na e plan aki den praktika. Pa Entidat Publiko Boneiru ta importante tambe pa duna partisipashon na hóbennan mes den e proseso aki. Huntu ku ministerionan konserní i gruponan ku ta representá hóben, lo investigá e mihó manera pa duna mas partisipashon na hubentut den asuntunan ku ta toka nan bida i nan futuro. 

Además Gobièrnu di Boneiru ta trahando riba proyektonan konkreto pa mehorá e posishon di nos hóbennan i salbaguardiá nan derechonan. Por ehèmpel ta trahando pa halsa kalidat di akohidanan di mucha i hasi esaki pagabel; pa konsientisá hóbennan di e importansia di kome saludabel  i bebe sifusiente awa; pa desaroyá aktividatnan pa hóbennan di tur edat i pa mehorá e servisio na mayornan ku tin mester di sostén den edukashon.  

Por último, ta importante pa kada ken ku tin un mucha of hóben den su bida, para ketu na e ròl importante ku nan tambe tin den e hóben su bida. Laga nos kada un sea un modelo pa nos hóbennan i asina krea lidernan aun mas fuerte pa futuro. 

Pabien na nos hóbennan riba nan dia!