16 di mart 2021 ta Dia Mundial di Trabou Sosial.
Trahadónan den e área sosial dia aden i dia afó ta duna tur di nan parti pa tur siudadano por desaroyá nan mes i partisipá den nos komunidat. Hopi biaha esei ta tuma lugá lubidando riba nan otro responsabilidatnan. E trabou sosial ta un trabou di hopi dedikashon, pasenshi, komprenshon i amor pa nos próhimo.
E pandemia di Covid akí a demostrá aun mas e importansia di trabou sosial kaminda profeshonalnan ta hasi lo máksimo pa yuda esnan mas vulnerabel den nos komunidat.
P’esei awe nos ke para ketu na e dia aki i felisitá kada trahadó sosial riba nan dia. Durante e pandemia tambe a mira kon koperashon entre e área sosial i inisiativanan partikular a trese proyektonan importante pa e suidadanonan.
E tema mundial ku E Federashon Internashonal di Trahadónan sosial (Internationale Federatie van Maatschappelijk Werkers – IFSW) a skohe pa 2020 te 2030 ta: ‘Mi ta, paso nos ta. Fortalesé Solidaridat Sosial i Union Global’.
Pa pone énfasis riba e tema aki Gobièrnu di Boneiru huntu ku Sentro Hubentut i Famia a organisá un mini konferensia pa su trahadónan sosial. Meta di e konferensia ta pa reflehá riba e tema i deliberá tokante e forsa i balor di e trabou sosial pa por hasi e trabou mas mihó posibel.
Relashoná ku e pandemia di COVID-19 Diputado Nina den Heyer ke enkurashá tur trahadó sosial di Boneiru pa reflehá riba nan trabou tan balioso i pensa kon huntu nos por aportá na drecha kalidat di bida di esnan mas vulnerabel den nos komunidat.
Pasa un dushi dia di trahadó sosial.
1 comment