Entidat Públiko Boneiru huntu ku WeConnect a lansa Youth Enterprise Platform (YEP), un plataforma pa empresario hóben. YEP ta un plataforma interaktivo ku tin komo meta pa stimulá hóbennan boneriano pa empresariado na Boneiru. Esaki ta konta pa tantu bonerianonan ku ta biba na Boneiru komo pa bonerianonan ku ta biba na Hulanda. YEP ta ofresé vários tayer pa duna un empuhe na empresariado na Boneiru i duna un bista di vakaturanan interesante i oportunidatnan empresarial na nos isla.
Kick-off
E kick-off a tuma lugá dia 3 di febrüari den oranan di tramèrdia na Business Incubator ‘BusinesSpark’ na Boneiru. Na nòmber di WeConnect e ‘young professional’ boneriano Paul David Romo a presentá e programa, akompañá pa oradornan invitá, ‘role model’ i empresarionan independiente na Boneiru. Hóbennan i dosentenan di Liseo Boneriano, SGB i MBO tabata presente na e lansamentu.
Programa interaktivo
E programa tabatin diferente elemento interaktivo, entre otro un ‘speeddate’ kaminda ya kaba hóbennan a bai den kòmbersashon ku e dunadónan di trabou i organisashonnan riba merkado laboral di Boneiru
ku tabata presente. Akí mesora kaba a kontestá hopi pregunta i a duna ‘input’ na e plataforma interaktivo. ‘Pa mi ta importante pa por konstruí un bida akí na Boneiru, pasobra akí ta mi kas. Mi ta kere ku YEP i e organisashonnan afiliá por aportá na esaki’, segun un di e studiantenan presente. E mènedjer di WeConnect Tanja Fraai tabata kontentu ku asina hopi hóben a asistí: ‘Loke ta importante na e Youth Enterprise Program ta ku bonerianonan hóben na Hulanda (i na Boneiru) ta haña un bista di loke por hasi komo empresario na Boneiru.’
Braindrain
Hopi biaha studiantenan boneriano den eksterior no ta bini bèk despues di nan estudio, pasobra nan ta pensa ku no tin posibilidat pa hasi karera na Boneiru. Pa e motibu akí tin kestion di un ‘braindrain’: bonerianonan ku a kaba studia i ku tin un formashon haltu ta konstruí un karera na un otro parti di mundu. ‘YEP ta un kontesta i un instrumento pa duna un bista na esunnan ku ke bini bèk, pero ku no sa na unda nan por kuminsá’, asina diputado Hennyson Thielman a indiká. E ta suprayá e importansia práktiko di YEP: ‘Ta sumamente importante ku hóbennan boneriano ku ta studia na Hulanda ta na altura di vakaturanan interesante i posibilidatnan pa kore stazje na Boneiru, ku komo meta pa lanta interes pa regresá Boneiru.’
Durante e próksimo lunanan vários tayer ta tuma lugá tokante empresariado, tantu na Boneiru komo na Hulanda. Pa zomer di 2023 e plataforma digital di YEP ta disponibel i tur hende por akudí riba dje pa informashon tokante vakatura, evento i tayer na Boneiru.
Mas informashon ta disponibel riba: www.stichtingweconnect.nl
