Entidat Públiko Boneiru i Fondo Mundial di Naturalesa Hulanda (WWF-NL) ofisialmente ta formalisá nan deseo konhunto pa koperashon riba tereno di naturalesa i medio ambiente den un deklarashon di intenshon, yamá tambe un Memorandum òf Understanding (MOU) e siman aki. Ku firmamentu di e MOU aki ta duna tambe e señal pa inisio di un kampaña konhunto di konsientisashon tokante redukshon di plèstik desechabel na Boneiru.
Fondo Mundial di Naturalesa Hulanda ya pa mas ku 50 aña ta sostené inisiativanan di naturalesa na Boneiru i tabata enbolbí ku kompra di Klein Bonaire i fundashon di Bonaire Marine Park. Organisashonnan manera STINAPA, Sea Turtle Conservation Bonaire, Reef Renewal, pero tambe Boneiru Duradero ta risibí fondonan for di e organisashon pa protekshon di naturalesa aki ku mundialmente ta aktivo. Na aña 2019 direktor di Fondo Mundial di Naturalesa Hulanda Kirsten Schuijt a bishitá Boneiru. E tempu ei el a bisa Gezaghèber Rijna ku Fondo Mundial di Naturalesa Hulanda gustosamente lo ke sostené gobièrnu lokal ku konosementu i eksperensia. Entre otro a realisá e deseo aki durante e preparashonnan pa yega na prohibishon di plèstik desechabel.
Den e simannan binidero lo entregá un konsepto di ordenansa na Kolegio Ehekutivo pa un prohibishon di suministrashon (bendementu òf dunamentu) di sierto tiponan di plèstik desechabel. Despues di 6 luna ku a anunsiá e prohibishon aki e ta drenta na vigor. Entre tantu pa medio di un kampaña di konsientisashon lo informá habitantenan di nos isla tokante e tiponan di plèstik desechabel ku dentro di poko no ta pèrmití mas na Boneiru. Selibon tambe ta forma parti di e kampaña aki.
E MOU ta enserá un kantidat ámplio di tereno di maneho manera maneho di shushi, purifikashon di awa, piskamentu na un manera sostenibel, ref di koral, sargaso i espesienan di animal ku ta bou di menasa di ekstinshon. Diputado Kroon i direktor di Fondo Mundial di Naturalesa Hulanda Kirsten Schuijt lo firma e dokumentu. Entidat Públiko Boneiru i Fondo Mundial di Naturalesa Hulanda kaminda e oportunidat presentá lo uni forsa i desplegá aktividatnan konhunto.
