Siman pasá empleadonan di Ministerio di Agrikultura, Naturalesa i Kalidat di
Kuminda (LNV) a bishitá Boneiru pa sera konosí i konsultá ku diputado Cicilia tokante
agrikultura, kalidat di kuminda i protekshon di naturalesa. E bishita di Ministerio di
Agrikultura, Naturalesa i Kalidat di Kuminda tabata prinsipalmente intenshoná pa sera
konosí i papia tokante státus di diferente proyekto di naturalesa ku ta andando.
Durante e bishita nan a deliberá tokante diferente proyekto, manera proyekto pa
restorashon di palu di mangel, kombatimentu di eroshon, restorashon di yerba di laman,
restorashon di koral, restorashon di naturalesa den Parke Washington i proyektonan di
agrikultura. E proyektonan akí ta importante pa motibu ku naturalesa na Boneiru ta bou di
menasa di retonan manera eroshon di suela, espesienan invasivo, kontaminashon di awa
i suela i konstrukshon na kosta. Protekshon di naturalesa ta importante tambe pa por
atendé mas mihó ku e konsekuensianan di sirkunstansianan ekstremo di wer debí na
kambio di klima.
Aktualmente Direktorado di Planifikashon i Desaroyo ta trahando riba un plan nobo pa
naturalesa pa e periodo di 2025 – 2029. E metanan mas prinsipal di e plan nobo akí ta
restorashon di ref di koral, konservashon i restorashon di áreanan di biba i espesienan
úniko, uso sostenibel di tera i awa pa ekonomia lokal i formulashon di kondishonnan lokal
pa resultadonan permanente di e maneho di naturalesa.
“E kolaborashon ku Ministerio di Agrikultura, Naturalesa i Kalidat di Kuminda ta yuda nos
logra nos metanan. Den nos akuerdo di gobernashon pa Boneiru, ‘E diferensia, hustu i
duradero 2023 – 2027’, a inkluí protekshon di naturalesa komo un di nos puntanan di
lansa di mas importante. E plan di naturalesa den kombinashon ku e futuro vishon
struktural pa Boneiru, lo ofresé sosten den ehekushon di nos ambishonnan pa nos bunita
isla”, segun diputado Cicilia.
previous post
next post