E bèrdat di Statia
Djamars awor 7 di yüni pa 7 or di anochi Movementu Kousa Promé ta organisá na su sede un enkuentro informativo ku e lider polítiko di Sint Eustatius honorabel señor Clyde van Putten.
Kiko a para di pueblo i polítika na Statia despues di e gòlpi brutal di estado ku Hulanda a ehekutá na 2018? Hulanda a drenta i manda tur polítiko i mandatario eligí kas. Hulanda a trapa outonomia di Statia i tuma gobernashon den su man sin nunka a bai elekshon. E gòlpi di estado di Knops ku Rutte tabata un humiashon di e pueblo di Statia. Statia tabata tin un gobièrnu legítimo ku el a eligí ku voto liber, demokrátiko i popular. Nos ta 4 aña después. Kon ta ku e bienestar di e pueblo di Statia ? Hulanda a drecha e situashon? Statia a bai dilanti ? Akudí djamars anochi 7’or na sede di Kousa Promé na Dominguitu Papayaweg 14. Na e evento aki Clyde van Putten lo t’ei direktamente for di Sint Eustatius pa splika pueblo di Kòrsou tur kos na plaka chikí. Clyde lo kontestá tur bo pregunta i prekupashonnan. Abo ku ta di Statia i bibá aki na Kòrsou ta bon biní pa skucha e lider di bo isla natal bosiferá loke ta biba aktualmente den kurason di e hende di Statia, despues di e humiashon di Hulanda. Movementu Kousa Promé ta invitá bo na e enkuentro ku Clyde van Putten na Dominguitu Papayaweg 14. E orario ta 7 or pa 9.30 i entrada ta grátis.
Movementu Kousa Promé ta warda bo. E lucha sagrado pa emansipashon ta sigui.
