Mas cu 60% ta opina cu nos isla no ta bayendo den bon rumbo
Accion 21 a conduci un encuesta cientifico aña pasa durante campaña politico, haci por medio di tercer partidonan, cu e obhetivo pa purba compronde e opinion di publico, nos pueblo su perspectiva riba diferente topiconan importante y na unda nan ta mira problemanan y solucionnan. E meta di e encuesta aki tabata pa purba compronde e punto di bista di nos pueblo riba diferente materia. E encuesta aki a wordo haci entre Januari cu Februari 2021, basa riba resultadonan di 1,529 participante anonimo.
Fraccion Accion 21 kier comparti algun di e resultadonan aki, pensamentonan, opinionnan y puntonan di bista di e participantenan di e encuesta aki pa mira con nan ta sinti riba cierto temanan. Un di e prome puntonan pa para keto riba dje ta e futuro y rumbo di nos isla, na unda cu 23.3% ta indica cu nan si ta haya Aruba ta bayendo den bon rumbo, un 12.7% no sa, y 64% ta haya cu Aruba no ta bayendo den bon rumbo.
Por a tuma nota tambe cu e districto di Santa Cruz a destaca di ta esun di mas optimista pa locual ta e rumbo di nos isla, y districto di San Nicolas como esun cu ta mustra di ta mas pesimista den e parti aki, pa locual tambe ta e rumbo y futuro di nan propio districto.
Corupcion y Nepotismo: Problemanan principal di Aruba
Algo cu ta hopi crucial pa remarca tambe den e resultado di e encuesta aki ta cu e mayoria di participantenan ta haya cu e problema principal di Aruba ta corupcion, sigui pa nepotismo, nos economia y problemanan social. E resultadonan tambe ta refleha cu districtonan di Noord/Tanki Leendert y Paradera ta esunnan cu mas ta percibi e problematica di corupcion riba nos isla, y districto di San Nicolas-Noord ta esun cu mas percepcion di nepotismo como problema principal di nos isla.
Otro aspectonan cu a wordo subraya ta falta di servicio di salud, na unda cu districto di San Nicolas-Zuid ta esun cu mas ta sufri di esaki.Segun resultadonan ta indica, e barionan unda cu mas tin servicionan deficiente di salud ta na Pastoor Hendrikstraat, Essoville y Lago/Esso Heights.
San Nicolas a wordo subraya tambe como districto na unda ta existi e presencia mas grandi di problemanan social relaciona cu hobennan riba caya. Es mas, den periodo di Januari 2021, ta indica cu 90.4% di persona ta indica cu nan mes of nan famia a sufri di un caso di violencia of criminalidad den e ultimo dianan prome cu participa den e encuesta.
“Loke a resalta pa mi ta con progresivo nos isla ta,” Parlamentario, sr. Miguel Mansur ta expresa. “Aunke mayoria di hende ta identifia corupcion y nepotismo como problematicanan, tog e partidonan grandi cu ta asocia, un di nan cu corupcion y e otro cu nepotismo, tog nan ta keda mantene basta voto,” sr. Mansur ta sigui bisa. E encuesta su resultadonan ta hancra tanto e mandato legislativo of popular pa bin cu cambio y modernisacion di leynan, pa refleha e actitud social cu ta bibando den nos pais,” sr. Mansur ta conclui.
