Na oktober 2022, Minister Geoffrey Wever a introduci e maneho nobo pa permiso di negoshi, e asina yama ‘Vestigingsbeleid 2022’. E meta di e maneho modernisa aki ta pa elimina “red-tape”, stimula mas negoshi pa habri na Aruba y asina crece Aruba su economia y reduci obstaculo pa inversion, pensando riba e spin-off economico y e cuponan di trabou nobo, como tambe e aumento di entrada pa caha di gobierno.
A haci diferente cambio na e maneho pa permiso di negoshi pa haci esaki mas eficiente y efectivo. 1.Digitalisa e servicio: por aplica online, upload documento, track proceso, ricibi notificacion y download e permiso. 2.Reduci obstaculo: A amplia e categoria di localnan door di haci posibel cu mas hende no-naci na Aruba por habri un negoshi sin cu mester pidi un permiso pa director, ya reduci tambe e periodo di residencia cu e persona naci na USA y Union Europeo mester tin pa ricibi un permiso di director. 3.Servicio: A mehora e servicio y simplifica e proceso door di rekeri menos documento; DEZHI ta consulta informacion digital cerca Censo y KvK pa facilita e cliente. 4.Menos restriccion: Ta stimula inversion den centro di Oranjestad y San Nicolas, stimula diversificacion di Aruba su economia a traves di e “six promising sectors”, plus duna companianan chikito, cu ta cumpli cu e criteria, e posibilidad pa establece den nan propio cas (zona residencial)
A logra hopi mehoracion, pero nos tin cu sigui innova pa asina tin e sistema mas efectivo posibel, y mas eficiente pa e usuario.” E intencion originalmente tabata pa procesa peticion di permiso den menos di 2 siman. “Aunke a logra hopi mehoracion, ainda tin espacio pa mas, pero ta dependiente di diferente factor,” segun minister Wever.
E Vestigingsbeleid 2022 ta casi 1 aña den implementacion y feedback ta parti importante den monitor e implementacion. Pa cu esaki e Afdeling Vestiging di DEZHI di Ministerio di Asuntonan Economico, a prepara un encuesta di satisfaccion di e cliente tocante e maneho di permiso pa habri negoshi.
E periodo pa participa na e encuesta ta di 1 september – 15 september 2023. Si bo a habri bo negoshi den e ultimo aña, nos ta encurasha bo pa participa via e siguiente link: https://bit.ly/BusinessLicensing2023
Minister Geoffrey Wever “ta pidi un y tur colabora cu e encuesta door di duna bo opinion pa asina nos por sigui mehora nos servicio. Bo opinion ta importante!”