Oficina Central di Estadistica (CBS) ta anuncia e comienso di e Encuesta di Entrada y Gastonan 2023-2024. E encuesta aki ta sumamente importante ya cu e informacion colecta lo wordo usa pa, entre otro, determina e macuto di compras riba cual CBS ta monitorea e prijsnan na Aruba pa asina por determina e inflacion. A base di e gastonan di tur e hogarnan encuesta, ta calcula tambe e peso di cada producto y/of servicio cumpra.
E encuesta aki tambe ta duna un bista amplio di e entrada y gastonan di hogarnan na Aruba y pa es motibo di e situacion economico y financiero di nos hogarnan. Di e forma aki por duna contesta na preguntanan relata na e situacion actual di hogarnan na Aruba como tambe por haci un calculacion nobo di bestaansminimum na Aruba.
E preguntanan inclui den e Encuesta di Entrada y Gastonan 2023-2024 y tambe e forma di conduci e encuesta aki ta basa riba standaardnan internacional prescribi pa Nacionnan Uni. Cada producto y servicio cumpra door di hogarnan tin nan mesun codificacion cu ta facilita e procesamento di e datonan y tambe e comparacion di datonan riba un nivel internacional.
E encuesta lo cuminsa diaranzon dia 15 di November 2023 y lo tin un duracion di un aña. Durante e periodo di encuesta, CBS tin como meta pa entrevista un total di 2000 hogar. Pa por logra e meta aki, cada luna nos encuestador(a)nan lo aserca 200 hogar. En total tin 20 encuestador(a) cu lo ta na encargo pa conduci e entrevistanan y cada luna nan lo wordo asigna un area specifico pa haci e encuesta. E areanan aki ta parti over di full Aruba pa asina por haya un bista representativo di tur tipo di hogar cu ta residencia den tur area di Aruba.
E encuesta di Entrada y Gastonan ta encera 2 parti:
- Hogarnan participante lo wordo puntra pa contesta algun preguntanan tocante gastonan cu e hogar a haci durante e 12 lunanan cu a pasa prome cu e encuesta aki. E cuestionario aki ta digital y lo wordo yena pa e encuestador(a) pa medio di un tablet.
- Hogarnan participante lo wordo pidi pa yena un Buki di Gastonan Diario. Den e buki aki tur gasto di tur miembro di e hogar mester wordo yena pa un periodo di 2 siman. E encuestador(a) lo duna instruccion na e hogarnan con pa yena e buki y tambe lo asisti den e yenamenato di esaki.
Encuestador(a)nan a haya un training extensivo di CBS tocante e metanan principal di e Encuesta di Entrada y Gastonan 2023-2024, e formularionan cu mester wordo yena y e proceduranan cu tin cu tene na cuenta durante di e ehecucion di e encuesta. Asina encuestador(a)nan tin tur informacion cu nan por brinda na hogarnan selecciona. Tur encuestador(a) di CBS tin un badge y un uniform pa identifica nan mes debidamente. Si acaso un encuestador(a) no tin su uniform bisti, semper e lo por identifica su mes cu su badge.
Ta bon pa tene na cuenta cu pa facilita e trabao di colecta e informacion di e hogarnan participante, e hogarnan por prepara e siguiente informacion:
- E ultimo recibo di awa, coriente, gas y telefoon;
- Informacion di hipoteca (si esaki ta aplicabel pa e hogar), incluyendo e suma ora a ricibi esaki, e suma paga na 2022 y e interes paga na 2022;
- Informacion di seguronan cu a wordo paga durante di e ultimo aña;
- Informacion di e entrada bruto y netto di e ultimo luna di tur miembro di e hogar.
Oficina Central di Estadistica y tur encuestador(a) cu ta traha pa Oficina Central di Estadistica ta mara pa ley na privacidad di datonan obteni. Oficina Central di Estadistica ta garantisa e anonimidad di e datonan individual di tur esnan cu a participa na e Encuesta di Entrada y Gastonan. E datonan lo wordo analisa y publica na forma agrega for di cual ningun persona of hogar por wordo distingui.
E encuesta aki ta sumamente importante ya cu a base di e datonan colecta ta calcula, entre otro, cu exactitud e inflacion, esta e subida of bahada di e prijs di productonan y tambe ta haya un bista detaya di e entrada y gastonan di hogarnan na Aruba. Na banda di esaki, hogarnan mes lo beneficia di nan participacion na e encuesta ya cu nan mes lo haya un bista detaya di “Na unda nan placa ta bay”.
Oficina Central di Estadistica ta pidi cooperacion di tur hogar cu wordo aserca pa un di nos encuestador(a)nan, pa por fabor coopera cu e encuesta aki. E exito di e encuesta di Entrada y Gastonan 2023-2024 ta depende di e cooperacion di un y tur.
Pa cualkier pregunta di e Encuesta di Entrada y Gastonan 2023-2024, por tuma contacto cu Oficina Central di Estadistica, durante oranan di oficina na 524-7433, y puntra pa cualkier miembro di e team di e encuesta. Tambe por manda un e-mail na cbs@setarnet.aw
