Minister di Cultura a hiba un discurso diasabra ultimo durante un evento na Cas di Cultura relaciona cu “Dia Mundial di Diversidad Cultural pa Dialogo y Desaroyo”. Un dia caminda a celebra e rikesa multicultural cu nos tin na nos Pais Aruba. Un anochi riba cual por a disfruta di un intercambio cultural di varios talento den forma di musica, baile y expresion artistico.
E mandatario a recorda cu aña pasa, para riba e mesun tarima na momento cu ela haci apertura di e evento aki tabata dilanti un sala bashi door di e protocolnan di e pandemia. E aña aki pa un y tur e ta un momento special, pasobra atrobe nos por bini hunto pa nos por comparti cu otro.
Ta un alegria di por tin un publico grandi pa presencia e di dos Encuentro Multicultural relaciona cu Celebracion di Dia Mundial di Diversidad Cultural pa Dialogo y Desaroyo.
Na aña 2001 UNESCO a haci un declaracion pa reconoce dia 21 di mei como Dia di diversidad cultural y na aña 2003 Nacionnan Uni a declara 21 di mei oficialmente como Dia Mundial di Diversidad Cultural pa Dialogo y Desaroyo. UNESCO y Nacionnan Uni ta confia cu si den cada pais por trece diferente cultura hunto, cu esaki ta contribui na paz, na desaroyo positivo y stabilidad social den e Pais. Pa medio di dialogo, comunica cu otro y inclusion, un Pais por logra biba den paz, harmonia y cu respet pa otro.
Riba e anochi aki Pais Aruba ta uni na e iniciativa di Unesco y Nacionnan Uni pa experiencia un bunita show di intercambio cultural, durante cual ta duna atencion na nos cultura y cultura di tur otro nacion cu ta biba hunto cu nos. Nos Pais ta brinda hogar na mas cu 90 nacionalidad di mas cu 130 pais. Segun Oficina Central di Estadistica Aruba, durante e Censo na aña 2020, a constata cu 37% di e poblacion di Aruba, ta personanan di otro nacionalidad. Esaki ta demostra cu apesar cu nos ta un pais chikito, nos Pais ta cas di varios nacionalidad, di diferente cultura, tradicion, balor y custumber cu ta biba den paz y harmonia cu otro. E mandatario a pidi pa haci uzo di e dia aki tambe pa reflexiona riba e balornan di diversidad cultural, riba e importancia di dialogo intercultural, pa compronde y respeta cultura di otro. Fomenta igualdad, siña di otro y biba den amor y union pa fortalece nos Pais Aruba.
E ‘Encuentro multicultural ‘aki ta un bunita iniciativa pa asina por comparti rikesa di cada cultura di diferente Pais. E evento ta brinda un plataforma pa nos duna atencion na e diferente
nacionnan cu ta biba aki y bini hunto y comparti cu nos comunidad nan cultura y talento artistico. Minister di Cultura ta hopi orguyoso di tin asina tanto potencial artistico di diferente Pais na Aruba.
E fecha 21 di mei tambe ta un fecha historico pa pueblo di Aruba, ya cu riba e fecha aki 19 aña pasa, Aruba a oficialisa nos idioma materno Papiamento. Nos dushi idioma Papiamento ta locual ta uni nos y diferente otro nacionalidad cu a bin residencia aki.
Minister Xiomara Maduro a haci uzo di e oportunidad tambe pa gradici un y tur cu a participa di un of otro forma, pa nan interes, esfuerso, trabou y aporte cu a ser haci pa e anochi, pa asina un y tur por a disfruta di un tremendo intercambio cultural. Palabra di gratitud na Departamento di Cultura, en especial e lider di e proyecto sr. Jhon Freddy Montoya cu a traha inalcansablemente y cu hopi pasion, pa haci e evento aki posibel. E mandatario a gradici tambe tur e miembronan di Cuerpo Consular na Aruba y Fundacionan cu semper ta participa pa asina por realisa e encuentro multicultural aki.
Na final e mandatario a haci un apelacion na un y tur pa ban sigui aporta na e Dia Mundial di Diversidad Cultural. Sigui fomenta inclusion y integracion, sigui biba den paz, trankilidad, harmonia y den union. Na tur cu a haci Aruba nan cas, danki pa tur locual cu boso ta aporta na bienestar di nos Pais Aruba. Laga nos sigui traha den amistad y union pa fortifica nos Pais. Nos diferencia ta locual ta enrikece nos y nos respet ta locual ta uni nos.
