Diaranson, 6 di maart 2024, di 6.30 p.m. pa 9.00 p.m., lo tin un actividad literario, cultural y linguistico na Biblioteca Nacional Aruba, George Madurostraat 13, den cuadro di celebracion di diferente fiesta hunto.
Biblioteca Nacional Aruba, Departamento di Cultura Aruba hunto cu gestor cultural Mirto Laclé lo presenta un programa multifacetico cu enfoke riba literatura, poesia, declamacion, canto, baile, musica, cultura y educacion en general.
Lo tin invitadonan special cu lo comparti nan pasion pa arte den e disciplina di arte cu cada un di nan ta eherce cu e.o. obranan artistico musical, arte di fotografia, arte di filmacion, tomo di poesia, y presentacion di dos obra literario.
Autor y poeta Ariana Koolman Chirino lo deleita cu algun poesia dedica na celebracion di Dia Internacional di Hende Muhe.
Maybelline Arends-Croes y su coro lo deleita cu algun cancion. Vivian Lampe lo toca piano.
Musico, autor y ‘motivational speaker’, Ashok Hirdaramani, naci na Sri Lanka y cu tin 43 aña biba na Aruba, lo presenta su buki Passion – Amazing – Mindset. E prologo ta skirbi pa Wini Paulo, filosofo, poeta, autor di Corsou. E buki ta trata temanan manera ‘Change and create the life you truly desire. Discover a new synthesis to unfold the real secret to manifest and attract abundance’.
Roberto Croes lo ta presente cu su ultimo tomo di poesia Sentimento IV cu ta un coleccion di poesia basa riba amor. E poesianan aki ta mustra cu bida tin su proposito y cu mester biba e bida cu amor, cu fe, cu dignidad, cu humildad y cu respet.
Jossy Farro, un Arubiano biba pa varios aña na Hulanda lo presenta un obra fotografico, dedica na pianista Livio Hermans (d.f.m.) Un potret saca pa Jossy Farro na Aruba durante un actividad na Biblioteca Nacional Aruba cu cual el a optene e prome premio di foto di luna februari participando pa Fotoclub de Zoeker na Hulanda cu e tema Zonido.
E anochi aki lo tin presentacion di grupo musical forma pa Ashok Hirdaramani and friends cu lo enterpreta Salsa y musica di Carlos Santana
Luna di maart ta un luna yen di celebracion e.o. Dia Internacional di Hende Muhe, Dia di Himno y Bandera, Dia Internacional di Poesia y na April Dia Internacional di Derecho di Autor. Bin celebra hunto cu Biblioteca Nacional Aruba. Entrada pa e actividad aki ta gratis. Por tuma contacto cu Mirto Laclé, cel. 7426274