E siman aki ta duna inicio na preparacion pa celebra Dia di Betico, nos Libertador cu a lucha pa nos Status Aparte. Pa cu esaki, Minister Xiomara Maduro di Cultura a bishita Maria Goretti College y Ayo Kleuterschool pa asina scucha di nos propio muchanan con nan lo bay celebra e dia aki.
Na Maria Goretti College, henter e scol a sali pa duna Minister Maduro un bonbini. Durante e bishita aki, e mandatario a combersa cu e muchanan riba ken tabata Betico Croes y kico ela nifica pa nos Pais.
Despues di esaki, Minister Maduro a sigui pa Ayo Kleuterschool caminda cu ela haya e oportunidad pa combersa cu esnan di mas chikito riba e dia aki y tambe pa scucha for di nan con nan lo bay celebra e fecha natal di nos Libertador.
Minister Maduro ta gradici directora, docentenan, personal y tur alumno di Maria Goretti College y Ayo Kleuterschool pa e caluroso bonbini y pa e mainta ameno cu ela pasa cu nan.
