KRALENDIJK,Bonaire
MKB,
federashon di Empresa Mediano i Chikitu na Hulanda Oropeo, ta dispuesto pa yuda
Boneiru ku eksplorashon di posibilidat pa stimulá desaroyo ekonómiko di nos
isla.
Esaki ta resultado di un kombersashon ku diputado Elvis Tjin Asjoe tabatin ku
direktor suplente Peter Hagemans di Empresa Mediano i Chikitu Hulanda. Tópiko
di e konsulta tabata e pregunta te kon leu e federashon por duna un aporte na
desaroyo ekonómiko di Boneiru, por ehèmpel pa medio di kompartí ekspertisio.
Pero tambe hopi konkreto habriendo porta pa Entidat Públiko Boneiru por yega na
instansianan ku ta interesante relashoná ku desaroyo ekonómiko di nos isla. Hagemans
i Tjin Asjoe tabata di akuerdo ku otro ku ta bon pa trese e oportunidatnan ku
sektor di empresario di Boneiru tin di ofresé mas enfátikamente bou di atenshon
di empresario hulandes oropeo. Den e kuadro aki e pensamentunan ta bai
prinsipalmente den direkshon di pone empresario na ámbos banda di oséano den
konekshon ku otro. Asina nan por probechá di otro su konosementu i eksperensia
i posiblemente desaroyá sierto aktividat
huntu. Esaki ta kuadra ku maneho di Kolegio Ehekutivo ku ta enfoká pa
stimulá inisiativa ku ta sòru pa empleo mihó pagá na bienestar di habitante ku
mester di dos trabou pa por alkansá fin di luna.
Tambe Hagemans a invitá Tjin Asjoe pa djòin e aktividatnan ku su organisashon
ta organisá den kuadro di Dia di Empresario. El a primintí ku Boneiru por hasi
uso di e instrumentonan ku a desaroyá pa e fin ei. El a bisa tambe ku e ta para
habrí pa partisipashon di Boneiru na e investigashon ku e federashon di empresa
na Hulanda ta laga hasi tur aña pa wak kua munisipio ta mas bentahoso pa
empresario.
Federashon di Empresa Mediano i Chikitu Hulanda ta atendé interes di mas ku
170.000 empresa afiliá.
Riba potrèt:
Direktor suplente Peter Hagemans di Empresa Mediano i Chikitu Hulanda i diputado Elvis Tjin Asjoe tabata di akuerdo ku otro ku mester trese oportunidat ku sektor di empresario di Boneiru tin di ofresé mas enfátikamente bou di atenshon di empresario hulandes oropeo.
