Dos ámtenar di e departamento di finansa di Entidat Públiko Boneiru (EPB) a tèst positivo pa Covid-19. E ámtenarnan ta na kas den isolashon. Niun personanan ku tabata delaster dianan na kualke servisio na EPB no a kore riesgo. E empleadonan no tabatin kontakto ku públiko pues klientenan no a kore niun riesgo.
Departamento di Salubridat Públiko a hasi un investigashon pa determiná ku kua persona tabatin kontakto i na unda e fuente di kontagio ta. A papia ku koleganan ku tabata kore riesgo. Koleganan ku tabatin kontakto ku e personanan kontagiá a bai den karentena preventivo. Na e manera aki ta prevení ku lo tin mas kontagio na e departamento.
For di e momento di e resien brote Entidat Públiko di Boneiru a tuma medida pa evitá ku e vírùs di corona ta plama. A kuminsá traha ku afsprak pa asina tin tur kliente ta registrá i evitá aglomerashon di hende. Banda di esei a sigui e instrukshonnan di higiena.
Medidanan di prevenshon i higiena ta keda importante manera mantené 1.5 meter distansia di otro. Si tin keho keda kas i yama 0800-0800. Mantené e instrukshonnan di higiena. Kome salú, drumi sufisiente i move regular pa hisa bo resistensia. Kuida bo mes i esnan rondó di bo.
