Embahador Noorman di bishita serka Promé Minister Rhuggenaath

Promé Minister, sr. Eugene Rhuggenaath resientemente durante un bishita pa sera konosí, a risibí e Embahador di Reino stashoná na Bogotá, Colombia, sr. Ernst Noorman. E kombersashon a tuma lugá den un esfera ameno den kua Promé Minister Rhuggenaath i Embahador Noorman a toka temanan di interes den e relashon bilateral entre Kòrsou i Colombia. Pa Kòrsou, Colombia ta un di e paisnan di prioridat no solamente pa e lasonan familiar di pais bisiña den region pero tambe entre otro pa e konekshon den ramo ekonómiko.

E liña prinsipal di e komberashon tabata pa será konosí pero tambe repasá e proyektonan andando entre Kòrsou i Colombia. Alabes e enkuentro a duna atenshon na identifiká algun sektor i/òf proyektonan potenshal pa yega na mas kolaborashon den futuro. Asina a elaborá tambe riba e situashon aktual di COVID-19 na Colombia inkluso e maneho di Colombia enkuanto bakunashon, pero tambe maneho di migrantenan.

Embahador Noorman a asumí e funshon for di sèptèmber 2020, pero no por a bishitá Kòrsou mas promé dor di e pandemia ku a asotá henter mundu. Pues pa algun tempu e Embahador tabata kana ku e deseo pa papia ku diferente gobernante i instanshanan na Kòrsou pa haña un mihó bista riba e puntonan di relevansia den relashon ku Colombia. Asina e Embahador tabata tin enkuentro ku entre otro Gobernador di Kòrsou, Su Ekselensia sra. Lucille George-Wout, Minister di Desaroyo Ekonómiko, sr. Steven Martina, Minister di Enseñansa, Siensia, Kultura i Deporte, sr. Steven Croes, Minister di Finansa, sr. Kenneth Gijsbertha, Minister di Hustisia, sr. Quincy Girigorie i entre otro instanshanan lokal.

Aparte di biaha pa será konosí ku e representantenan na Kòrsou, Embahador Noorman a probechá tambe pa biaha pa Aruba i asina hasi un bishita pa será konosí ku representantenan di nos isla ruman. Ta trata di un Embahador ku tin eksperensha di a traha pa un periodo kòrtiku na Kòrsou, pero tambe na Sürnam. Promé Minister Rhuggenaath a ekspresá palabranan di ta habrí pa kontinuá e kolaborashon pa fortalesé e relashon bilateral entre Kòrsou i Colombia.