“Mi ta hopi orguyoso cu e delegacion di turismo di Aruba a opta pa envolvi e embahada di Reino Hulandes den e esfuerso aki, mirando cu Aruba ta ofrece hopi pa Peru y demas paisnan”, asina Alexander Kofman, Embahador di Reino Hulandes pa Peru, Ecuador y Bolivia, a duna di conoce. E delegacion di Aruba, consistiendo di ehecutivonan di Oficina di Turismo di Aruba, di Aruba Airport Authority y di Migracion Aruba, a topa cu e representante diplomatico na Lima, Peru.
Kofman a expresa cu ta bon pa tende kico tur nan tin pa ofrece y e tin tur confiansa cu hopi Peruano y demas ciudadanonan di Latino America y Chile lo opta pa bishita Aruba.
Aruba a mustra disponibilidad pa por traha mas cerca cu e Embahada riba tema di turismo pa nos isla. E Embahada ta dispuesto tambe pa por intermedia mas cu otro aerolineanan, cu Gobierno di Peru y otro partnernan strategico. E ta consciente cu e aeropuerto di Peru ta un “hub” importante pa Cono Sur, cu ta inclui Argentina, Chile, Ecuador, Bolivia, etc. El a señala cu hopi Peruano ta busca beach pa pasa vakantie y Aruba ta ofrece tur esey y hopi mas!
Na momento cu a puntra Alexander Kofman kico tur e embahada por haci pa turismo el a duna di conoce cu “e trabou ta masha facil pasobra Aruba ta fuerte den e mercado pero loke nos por haci ta pa informa e hendenan na Peru tocante tur e cosnan bunita cu Aruba tin y ta esey nos lo haci tambe!”.
Tocante Alexander Kofman
Alexander Kofman ta Embahador di Reino Hulandes na Lima, Peru. Ademas e tin acreditacion na Bolivia y na Ecuador. El a asumi e funcion aki na aña 2023. Prome cu esey, for di aña 2018 pa aña 2023, e tabata Hefe di Servicio y tambe Director Adhunto (2002) pa WereldWijdWerken (3W). Na aña 2014 te cu aña 2018 e tabata Embahador Adhunto na San Jose, Costa Rica.
