Despues ku na luna di novèmber aña pasá a pone e pilánan di fundeshi pa ekstenshon di Waf Nello Craane, a kuminsá ku e siguiente fase di e proyekto aki. Riba e pilánan di fundeshi a pone e konstrukshon parti abou kompletamente prefabriká di e ekstenshon di waf. E kompania Knol ku ta realisá e proyekto aki i ku na aña 2018 tambe a ehekutá renobashon di Waf Nello Craane, a traha tur e partinan di beton na Akkrum, Friesland.
Ku e barku Eurogracht di e kompania Spliethoff a transportá e desenas di balki di betón i partinan di flur. Pa motibu ku tin partinan ku ta pisa mas ku 20 tòn i na Boneiru no tin un kran ku por hisa esakinan, a pone e partinan aki ku kran di e barku riba e pilánan ku nan a konstruí anteriormente.
‘Ta pa di promé biaha ku ta usa e barku komo kran di konstrukshon’, asina e promé ofisial, kende sigur a gosa henter e operashon, a bisa orguyoso. Tur kos a kana bon i dentro di un dia e trabou di hisamentu ku kran di barku a keda kla bou di direkshon di e kompania Knol.
Kolegio Ehekutivo tabata testigu di e akshonnan ora nan a tuma lugá. ‘Bo no por imaginá bo mes kon nan a pone e partinan pisá aki ku gran presishon riba e pilánan di fundeshi.’ Esaki tabata reakshon di gezaghèber Edison Rijna ora ku el a mira kon ta ehekutá e trabou. ‘Ta parse manera ta konstruí ku Lego, pero hopi mas grandi i mas pisá. Hopi ekselente loke nan a presta aki,’ asina tabata su opinion.
Pronto ta terminá ekstenshon di Waf Nello Craane mas aleu. E kompania Stone Crusher a entregá 100 meter kúbiko di betòn pa e último parti di konstrukshon di ekstenshon di e waf.
