akuerdo ku Frakshon di MFK den Parlamento
Frakshon di MFK den un solo palabra ta kuestioná ekspreshonnan resiente ku sr. Francis “Grandi” Knepa di Radio Margaritha a hasi kontra di e sekso femenino den nos komunidat. Ta ku asombro i asko ku frakshon di MFK a tuma nota kon den un programa radial, gerente dje radio emisora tabata kaba ku e echo ku algun hende muhé awendia ta okupá puestonan klave den nos komunidat.
Sr. Knepa, den e programa radial di forma tekstual a bisa “hende muhé por ta nos mama i nos kasá, pero hende muhé por ta hechadó di baina masha grandi. E muhénan a emansipá, nan a pretendé, nan a stop di laba, guma, strika, haña yu, drenta den posishonnan ku ta netamente típiko di hende hòmber. Mester pensa si e desaroyo di hende muhé aki a kumbiní e país aki. Pasó ami ta bisa bo, hopi dje desishonnan kòmbòunan, e strangulamentunan aki, investigá bai patras bo ta mira. Hòmbernan a hala un banda òf hòmbernan ta hasi manera muhé, anto e kos ku e hende muhénan aki ta hasi, ta e kosnan ku nos ta papiando di nan. Na Aqualectra, ta kasi hende muhé so tin einan”.
Sr. Knepa tekstualmente ta sigui bisa:”Sierto kaminda muhénan mester bai bèk, bai laba, guma, strika, wak yu, pasó e mundu di awendia, esei ta la kousa. E mundu di muchanan ku no tin respèt, muchanan ku no tin edukashon, pasó antes tabata trabou dje muhé. Hende hòmber tabata traha pone pan riba mesa, anto muhé mester a wak mucha, desaroyo, siña mucha, bisti mucha. Pero muhénan a laga yu pa nan kuenta, bai traha trabou di hende hòmber, anto ora bo evaluá, analisá, anto mira e desaroyo, tin poko muhé heru heru. Dios spar hende ku nan.
Hende muhé ta mama i ta prokreá i mester por pensa otro, kon ta kuida, i kon mester mira e kosnan otro. Pero hende muhé ta bin hacha hacha. Ta muhé ta manda mundu, awèl muhé a daña mundu tambe”, di akuerdo ku deklarashonnan hasí pa Sr. Knepa.
Frakshon di MFK ta kere ku na Kòrsou i mundu kompleto e hende muhénan a desaroyá.i emansipá. Den un país demokrátiko, hende muhénan tin derechi igual ku e hende hòmber.
P’esei despues di a skucha e ekspreshonnan aki hasí pa gerente di Radio Margaritha, frakshon di MFK publikamente kier ekspresá palabranan di eskusa na tur hende muhé den nos komunidat i ta kere ku komunidat mester eksigí un diskulpa profundo di parti di gerensia di Radio Margaritha, pa e barbaridatnan ekspresá durante dicho programa.
Ta inaseptabel ku despues di tantu aña di desaroyo i emansipashon di hende muhé na Kòrsou, gerente di un radio emisora por habri mikrófono i papia di un forma asina denigrante di hende muhé. Frakshon di MFK ta denunsiá i kondená esaki publikamente, p’asina niun otro siudadano ni òf otro organisashon no tribi di ekspresá barbaridatnan na un nivel asina baho.