Tourism Corporation Bonaire (TCB) ta preparando su mes pa Dia di Rincon. Komo preparashon pa e di 35 aniversario di e dia di fiesta nashonal akí, TCB ke rekòrda bishitantenan i komunidat di Boneiru riba e tremendo aventuranan ku nan por eksperensiá riba e kaminda prinsipal ku ta kondusí pa Rincon.
Rincon ta e pueblo mas bieu di Boneiru, i e ta brinda nos isla un enkanto spesial. Ta importante pa dediká tempu i atenshon na kultura i patrimonio di nos isla, i esaki ta loke ta pasa durante henter luna di aprel. Na kaminda pa e dia grandi riba 30 di aprel, hopi aktividat i evento ta bai tuma lugá. Pa mas informashon tokante Dia di Rincon bo por manda un email pa info@diadirincon.org òf bishitá e wèpsait www.diadirincon.org.
E kaminda prinsipal ku ta bai Rincon ta konsistí di 5 parti: Kaminda Gurubu, Kaminda Tras di Montaña, Kaminda Sabana Piedra Krus, Kaminda Onima i Bulevar Miguel A. Pourier. Kada parti tin su prendanan skondí ku ta hiba bo riba aventura, miéntras bo ta desviá for di e rutanan di kustumber. Tuma un kurashi i kana kaminda normalmente ningun hende no ta bai, i kompartí bo eksperensianan ku nos.
Koriendo riba Kaminda Gurubú, na bo man robes bo ta haña Kaya Karibe ku ta hiba bo Nort’i Saliña i bisindario. Na man drechi bo ta haña e vèlt di futbòl kaminda klupnan lokal ta entrená. Sigui kore un tiki mas i bo ta haña e kaminda ku ta bai Finca Verde, na unda bo por gosa di un trankilidat i silensio ku ta pertenesé na un estadia leu for di siudat. Sigui e kaminda ku ta bai Pos Gurubú. Akí tras tin ruta pa kaminata ku ta hiba bo riba aventura den naturalesa.
Riba Kaminda Tras di Montaña bo ta haña e punto kaminda e rutanan di kaminata den e área di Tras di Montaña ta kuminsá. Por haña mapa di e rutanan akí na ofisina di TCB. Na man drechi bo ta mira un kaminda banda di un vèlt grandi. Einan tin un bòrchi for di nos kampaña di e proyekto di señalisashon, ku ta konta bo tokante historia di e área akí i si bo drenta Kaminda Seru Largu, bo ta alkansá Seru Largu, kaminda bo tin un bista hopi bunita riba parti sùit di nos isla. Si bo sigui kore riba e kaminda ei, bo ta mira un vèlt di futbòl, un vèlt di beisbòl i un vèlt di bólas un poko dekaí. Habitantenan di Boneiru ta usa e vèlt di futbòl komo un vèlt pa trein kore blokart, un pista di aterizahe pa avion di modelo chikitu i un tereno kaminda ta trein kachó. Klupnan lokal ta usa e vèlt di beisbòl pa trein pa nan kompetensianan di beisbòl. Tin ora e vèlt di bólas ta parse bandoná. Ora ku temporada di bólas kuminsá atrobe, nan ta drech’é i despues di esei e ta kla pa nan us’é di nobo.
Riba Kaminda Tras di Montaña bo ta haña un hanchi ku ta bai Dos Iguana, Outdoor Fitness Gym by Annemieke i Tera Barra. Dos Iguana ta un akomodashon ku ta laga bo eksperensiá e estilo di bida di kunuku na Boneiru. E Outdoor Fitness Gym ta un tremendo alternativa pa e gym regular, pa motibu ku bo ta den naturalesa i bo tin un bista fantástiko riba e paisahe miéntras bo ta trein bo bòdi. Por bishitá e gym akí solamente ku sita i e ta bou di guia di e entrenadó Annemieke, ku bo por alkansá pa medio di yama e number di telefón 785 4393 òf pa medio di manda un email na info@byannemieke.nl. Terra Barra ta un hardin endémiko kaminda nan ta usa mata endémiko pa krea paisahe ekológiko. E hardin akí ta habrí riba djaweps i djabièrnè for di 8.00 or te 12.00 or i riba djasabra for di 8.00 or te 13.00 or.
Riba Kaminda Tras di Montaña na bo man drechi bo ta haña Tanki Maraka, e parke di patrimonio di Segundo Guera Mundial, un museo na aire liber ku ruina for di pasado i bòrchi ku echo i potrèt históriko riba nan. Un tiki mas leu na man robes tin un hanchi ku ta hiba bo Bonaire Botanical Garden. Finalmente kasi na kabamentu di Kaminda Tras di Montaña bo ta haña Wanta Brek Snack, un bar kantu di kaminda sin nòmber riba dje, kaminda hendenan ta para pa bebe algu ora nan ta bai Rincon òf ora nan ta biniendo bèk for di Rincon. Mayoria biaha e ta habrí den wikènt, prinsipalmente riba djadumingu, pero no tin un orario ofisial ku e ta habrí.
Na kuminsamentu di Kaminda Sabana Piedra Krus, promé ku bo baha seru, tin un hanchi na man drechi. Na final di e hanchi akí bo ta haña Landhuis Ernestina, ku ta disponibel komo akomodashon òf komo sitio pa evento. Si bo kita na man drechi i baha seru, bo ta mira e pista di Bonaire Landsailing Adventures. Ora bo pasa Piedra Krus, un monumento den forma di un krus, finalmente bo ta mira un bòrchi ku ta indiká e kaminda pa bai Fontein. Fontein ta e úniko fuente di awa dushi na nos isla ku ta kore den forma natural, i ku den luna di óktober 2023 gobièrnu a kumpra bèk. E ta temporalmente será te ora nan por hasi e trabounan pa pon’é disponibel pa komunidat.
Na man drechi bo ta haña Kaminda Onima ku ta bai Onima. Promé ku bo yega Onima, bo ta mira un tereno será ku ta forma parti di Dragstrip Bonaire, kaminda amantenan di motosaikel por kima tayer. Ora ku seguidamente bo kontinuá riba e kaminda di tera i bira na man robes riba e pida kaminda mas largu, bo ta yega na e kuebanan di Onima ku pintura di indjan. Despues bo ta sigui kore i pasa banda di e boka yamá Boka Onima.
Ora ku bo subi Bulevar Miguel A. Pourier, bo ta dilanti di porta di Rincon. Via e kaminda akí bo ta drenta Rincon. Si bo tira un bista rònt di bo, bo ta mira kon e paranan ta bula i kon kabritu ta kana riba e barankanan na kantu di kaminda. Na honor di e festividatnan ku ta na kaminda, TCB ta invitá tur hende pa kompartí nan eksperensianan riba e kaminda pa Rincon riba medionan sosial ku ayudo di e hashtag-nan #bonaireisland #yesbonaire #bonaire #itsinournature.
