Segun un di nos eksperto nan hòmber versá den diferente faseta, Jeffrey Levenstone ta trese dilanti, ta duna un splikashon alkaso den su analísis profeshonal, ta bisa ku for di e fecha magiko 10.10.10, Boneiru a laga los na tur instrumentonan ku e tabatin den su man pa proteha tantu e konsumido lokal komo e komersiante lokal. E stap aki huntu ku e stap pa elimina impuesto riba ganashi i fasilidatnan di eksonerashon riba impuesto di entrada, a krea un espasio finansiero uniko pa tur komersiante lokal. Meta tras di e stapnan aki tabata i ta pa e komersiante tin mas espasio pa inverti den su negoshi i den su empleadonan. (pensamentunan sexy, pero ku no a juda Boneiru ku nada)
E parti di invershon den e empleadonan i den e negoshi sinembargo a keda hopi atras si bo relativa esaki na e entradanan ekstra ku e komersiante a akumula. Loke ku nos ta mira ta ku e parti di ganashi, si no a keda atras. Merkado liber (merkado komersial ekonomiko sin restrikshon i kondishon), a hasi su entrada i a resulta den un boshi di Carwash, boshi di lugar pa bende ijskream, boshi ikompania di konstrukshon chiki, boshi di truk di pan i un kantidat di negoshi pa hasi mantenshon. Tur kompetiendo kontra otro i mordiendo otro ku intenshon pa mata. E vishon tras di merkado liber, ta ku e kompetensia entre kompanianan lo resulta na fabor di e konsumido pasobra e preis pa servisio lo baha. (pensamentunan sexy, pero ku no a juda Boneiru ku nada). E pensamentu aki sinembargo no ta subi den komunidatnan chiki manera Boneiru pasobra bo falta e instrumentu mayo den esaki. E instrumentu ku mi ta referi na dje ta e fluho di konsumido ku ta duna e komersiante e posibilidat di kompeti riba riba volumen. (splikashon: e komersiante ta baha preis i saka su ganashi riba benta na kantidat). Ta esaki kompanianan grandi i frankisianan internashonal ta hasi). E situashon aki no ta faktibel na Boneiru pasobra bo no tin e kantidat di konsumido pa hasi esaki.
Nos sitashon ta ku 90% di komersiantenan ta kumpra na e mes kaminda(nan), riba e mesun preis di benta (pasobra e komersiante no por kumpra mas tantu pa e hanja miho preis), esaki ta komo konsekuensha di e kantidat di konsumido ku bo tin. Su resultado no por baha. Jegando na e situashon aktual ku ta kategorisa su mes ku subidanan ekstraordinario di preis di benta, nos mester konklui ku no tin otro opshon ku no ta; “regulashon di merkado laboral si gobiernu ke krea un komunidat sigur, partisipativo, elimina pobresa i duna oportunidat igual na un i tur”. Esakinan ta palabranan ku bo ta tende ku regularidat. Te ku awe sinembargo nan a keda na palabra. Mester tuma akshon i regula merkado den su totalidat. Si nos no hasi esaki, nos lo keda ‘mop ku kranchi habri’.
Bo no por elimina pobresa sin regula bo merkado laboral;
Bo no por fasilita kreashon di un komunidat stabil, sigur i partisipativo, sin regula bo merkado laboral;
Bo no por fasilita bienestar general sin, regula bo merkado laboral;
Mi ta trese e puntonan aki dilanti pa e por penetra den nos hendenan, nos representantenan di pueblo i nos gobiernu tuma nota. Tin kantidat grandi di instrumentunan ku por usa pa regula nos merkado laboral; por influensha i kontrola preis, kontrola kantidat i tipo di establesimentu, por regula pa sektor e kas salarial, por regula penshon pa tur sektor i por stimula tambe kresementu di empleadonan dor di regulashon di training i edukashon. ( pensamantunan no sexy i ku hasta por ser jama konservativo, pero nesesario i ku lo trese e resultado desea).
Loke sigur no por hasi ta ‘laat maar waaien” i esun ku ta mas fuerte lo sobrebibi, manera ta e kaso awor aki i ku basikamente ta merkado liber. Dikon no, pasobra ami ta garantisabo ku e lokal, lo no sobrebibi loke ta nifika ku e vishon di Boneiru; “Kresementu ku mantenshon di nos Naturalesa i nos Kultura –lesa; nos identidat- por wordu hiba Landfill numa.
